Элгээйи “Ёлочка” уһуйааныгар “Оҕо төрөөбүт төрүт тылын сайыннарыыга сахалыы эйгэни тэрийии” диэн ааттаах улуус эдэр иитээччилэригэр аналлаах улуустааҕы сэминээр буолан ааста.
Тэрээһин сүрүн сыалынан оҕону кыра сааһыттан ийэ тылыгар сыһыаран иитии-үөрэтии сүрүн хайысхаларын, ньымаларын билиһиннэрии буолар.
Биир кэлим федеральнай үөрэх бырагырааматын бэйэбит суруйар чааспыт туһунан уһуйааммыт бырагырааматын иитээччилэр Евдокия Татаринова, Нюргустана Алексеева билиһиннэрдилэр. Олохтоох мелодист Калиста Пахомова ырыаларынан “Ырыаһыт ымыылар” ырыа күрэҕин тэрийии туһунан музыка кэрэ эйгэтигэр уһуйааччы Наталья Баишева кэпсээтэ, оҕолорун ыллатта. Олохтоох суруйааччылар ини-бии Аким уонна Ариан Кондратьевтар айымньыларын оҕолорго билиһиннэрии туһунан иитээччилэр Нина Андреева, Анна Ефимова кэпсээтилэр. “Эбэм сандалыта” диэн оҕону төрүт аска сыһыарыы туһунан бырайыагын иитээччи Людмила Сергеева билиһиннэрдэ. Уһуйааҥҥа оҕо тылын сайыннарыыга медийнай эйгэни тэрийии туһунан сэминээр кыттыылаахтарыгар билиһиннэрдим.
Туойунан мэһийэн оҥоруу ньымаларын көрдөрөн “Сахалыы үтүлүк” диэн маастар-кылааһы иитээччи Клара Яковлев ыытта. Төрөөбүт төрүт тылынан тылы сайыннарыыга барар үлэни көрдөрөр квест-оонньууну оҕолорго иитээччилэр Евдокия Татаринова, Клавдия Яковлева ыыттылар.
Бу күн төрөппүт оҕотун кытта дьарыктанарыгар аналлаах интерактивнай тэтэрээти иитээччилэр Татьяна Андреева, Валерия Сафонова сүрэхтээтилэр.
Улуус үөрэҕин салаатыттан сэминээргэ Урсууна Федорова кыттыыны ылла. Сэминээр үлэтэ бэрт сэргэхтик барбытын, элбэҕи сэргээбитин туһунан санаатын эттэ, сүбэлэрин биэрдэ. Түмүккэ сэминээр үлэтигэр кыттыыны ылбыт эдэр иитээччилэр туох сонуну, саҥаны билбиттэрин-көрбүттэрин, инникитин бэйэлэрин үлэлэригэр тугу туһаныахтарын баҕаралларын туһунан санааларын үллэһиннилэр.
Марина Харитонова, Элгээйитээҕи «Елочка» уһуйаан сэбиэдиссэйэ