Сунтаардааҕы политехническэй лиссиэй-интэринээт «Ай-сатаа» технопаркатыгар «Эдэр дизайнер» диэн өрөспүүбүлүкэтээҕи күрэс ыытылынна. Манна Сунтаар улууһуттан 50-тан тахса оҕо үрдүттэн кытынна. Ону тэҥэ, 12 улуустан оҕолор кэтэхтэн үлэлэрин ыыттылар. Бырайыак ааптарынан 2022 с. Арассыыйа бастыҥ учуутала бириэмийэ, СӨ 100 бастыҥ учууталларын ахсааныгар киирбит, лиссиэй технологияҕа учуутала Любовь Федорова буолар. Кини айан-тутан таһаарарга үөрэппит-такайбыт оҕолоро өрөспүүбүлүкэҕэ эрэ буолбакка дойду таһымыгар элбэх ситиһиилэнэллэр: «Бу күрэспитин иккис төгүлүн ыытабыт. Кыттааччы элбэҕэ үөрдэр. Оҕо үөрэҕи тэҥэ айар-тутар дьоҕура эмиэ сайдыахтаах. Маннык күрэстэргэ кыттан оҕо сайдар, сатабыла улаатар, билиитэ кэҥиир» диэн уопуттаах уһуйааччы санаатын үллэстэр.
Эдэр дизайнердар күрэстэрэ С.А.Зверев-Кыыл Уола төрөөбүтэ 125 сылыгар ананна. Онон күрэс аһыллыыта сахалыы тыынынан ааста. Оҕолор алгыс иҥэриннилэр, алгыстаах алаадьынан күндүлэннилэр, Тоҕус Мэҥэ хамнаныыны толордулар, оһуокайга эргийдилэр. Ол кэнниттэн оҕолор ураты, истиҥ турукка киирэн күрэстэрин сорудаҕын билистилэр. Ол курдук, улуу киһибит Сибиэрэп айымньыларынан симэх оҥороллорун соһуйа да, сэргии да иһиттилэр. Үгүс оҕолор Сибиэрэп туһунан, кини айымньыларын истэн билэллэрин, аахпыттарын эттилэр. Онтон харахтарыгар ойуулаан көрбүт симэхтэрин уруһуйга түһэрдилэр. Күрэскэ ойуулуур-дьүһүннүүр эрэ дьоҕурдаах оҕолор кыттыбатылар, тутан-хабан оҥорор талааннаах оҕолор оҥоһуктарын тутатына оҥорон көрдөрдүлэр.
Эдэр дизайнердар саастарынан арахсан 5,6 кылаас оҕолоро ытарҕа, 7-8 кылаастар төбө киэргэлин онтон 9, 10, 11 кылаас үөрэнээччилэрэ коллекция оҥорон таһаардылар. Кэлин бу оҕолор оҥорбут үлэлэринэн араас быыстапкаларга кыттыахтарын, бэлэх-туһах да быһыытынан оҥоруохтарын сөп. Оҕолор үлэлэрин биллиилээх уустар, ювелир-педагогтар сыаналаатылар. Экспердэринэн СВФУ уһуйааччылара, ону тэҥэ, Сунтаардааҕы технологическай колледж ювелирдары бэлэмниир салаа маастардара, Сунтаар улууһун норуотун маастара, профессиональнай үөрэхтээһин туйгуна Дария Тотонова, Сунтаар улууһун норуотун маастара Константин Тотонов үлэлээтилэр.
Күрэс кэмигэр СПТЛИ эбии үөрэхтээһин педагога Пантелеймон Попов эдэр дизайнердар уһуйааччыларыгар түөскэ кэтэр «Күн» харысхал-киэргэл оҥорууга маастар кылаас ыытта.
Бастыҥ дизайнердарынан бу оҕолор ааттаннылар:
5-6 кылаастарга ытарҕа оҥорооһунугар
1 үрдэл — Сандаара Ефимова, Сунтаардааҕы гимназия 6 кылааһын үөрэнээччитэ (сал. Иванова А. Н)
2 үрдэл- Алгыстаана Потапова , 6 кылаас үөрэнээччитэ (сал.Попова А. А.)
3 үрдэл — Энесса Иванова, Сунтаардааҕы гимназия оскуолатын 6 кылааһын үөрэнээччитэ (сал.Иванова А.Н.)
7-8 кылаастарга төбө киэргэлин оҥорооһунугар:
1 үрдэл — Галина Николаева, Бүлүүчээн оскуолатын 7 кылааһын үөрэнээччитэ (сал. Данилова Л. Е.)
2 үрдэл -Айыына Алексеева , СПТЛИ 7 кылааһын үөрэнээччитэ (сал. Николаева З. В.)
3 үрдэл — Нарияна Григорьева, Сунтаар №1-дээх оскуолатын 7 кылааһын үөрэнээччитэ (сал. Андросова Н.С)
9-11 кылаастарга толору симэх кэмпилиэгин оҥорооһунугар:
1 үрдэл — Света Иванова, СПТЛИ 11 кылааһын үөрэнээччитэ (сал. Николаева З.В)
2 үрдэл — Нарияна Петрова, СПТЛИ 11 кылааһын үөрэнээччитэ (сал.Попова А. А)
3 м — Эльза Фомина, СПТЛИ 10 кылааһын үөрэнээччитэ (сал.Потапова Ф. П, Николаева Д. А)
Эдэр дизайнердарга кылаан кыайыылаах үүрдүк аатын Мичийэ Саввина, Күүкэй оскуолатын 6 кылааһын үөрэнээччитэ (сал. Харитонова С.А.) ылла.
«Мастерство» анал ааты — Жемчужина Генерова, Куокуну оскуолатын 6 кылааһын үөрэнээччитэ (сал.Констаниинова С. Н.)
«Оригинальное украшение» анал аат — Василий Петров, СПТЛИ 5 кылааһын үөрэнээччитэ (сал. Попов П. А.)
«Инновационный дизайн» анал аат — Сандаара Иванова, 7 кылаас үөрэнээччитэ (сал. Федорова Л. Г)
«Лучшая графика» анал аат — Санита Егорова , СПТЛИ 7 кылааһын үөрэнээччитэ (сал. Сосина О. О.)
Талааннаах оҕолору «Харандаас» маҕаһыын, Жиркова Т.Т. уонна Федоровтар дьиэ кэргэттэрэ өйөөн бэлэх туттардылар.
Мира АФАНАСЬЕВА
