«Өбүгэ үгэһин үйэтитэр удьуор уус Уйбаныаптар» быыстапкалара турда

Бүгүн, муус устар 2 күнүгэр, «Сунтаардааҕы С.А. Зверев – Кыыл Уола аатынан холбоһуктаах түмэл» дьиэтигэр Сунтаар нэһилиэгин саха төрүт иһитин өбүгэбит ньыматынан оҥорон киэҥник тарҕатар ураты дьоҕурдаах Сунтаар олохтоохторо Саргылаана,Иннокентий Ивановтар «Өбүгэ үгэһин үйэтитэр удьуор уус Уйбаныаптар» айар быыстапкалара аһылынна.

Арассыыйаҕа Дьиэ кэргэн, өрөспүүбүлүкэҕэ Оҕо саас, улууспутугар Аҕам саастаахтарга ытыктабыл сылларыгар сөп түбэһиннэрэн тэриллибит уран быыстапка аһыллар дьоро түгэнинэн Ивановтар дьиэ кэргэни улуус баһылыгын солбуйааччы Николай Александров, Сунтаар улууһун айылгытын уонна култууратын управлениетын салайааччы Саргылаана Омукова, дьиэ кэргэн доҕотторо-атастара, о.д.а. ыалдьыттар эҕэрдэлээн тыл эттилэр. Сахалыы тойук дуорайда, кэлбит дьону алаадьынан, кымыһынан айах туттулар.

Быыстапкаҕа турбут удьуордаан уус, тарбахтарыгар талба талааннаах дьиэ кэргэн оҥорбут мас, туос иһиттэрэ, дьиэ кэргэни билиһиннэрэр хаартыска галереята бар дьон болҕомтотун тартылар.

Сэҥээрбиттэр быыстапканы «Сунтаардааҕы С.А. Зверев – Кыыл Уола аатынан холбоһуктаах түмэл» дьиэтигэр кэлэн көрүөххүтүн сөп.

Дмитрий ЫМЫЧАНОВ.

Читайте дальше