Уһун Күөл нэһилиэгэр анал байыаннай дьайыыга кырыктаах кыргыһыыга олоҕун толук уурбут, хорсун буойун, Арассыыйа Дьоруойа Дмитрий Егоров сырдык кэриэһигэр улуустааҕы «Муус Күүлэй-2023» аһаҕас күрэс буолан ааста.
Тэрээһин саҕаланыыта Сунтаар улууһун Аҕалар түмсүүлэрин салайааччы Борис Уларов аҕаларга түмсүү чилиэнэ буолалларын туоһулуур анал бэлиэни — дастабырыанньаны — туттарда.
Бу тэрээһиҥҥэ 3 хамаанда күөн көрүстэ. Түмүккэ I миэстэ буолбут Г.А. Андреев , И.В. Тихонов, 10-с кылаас үөрэнээччитэ Олимпий Иванов чилиэннэрдээх хамаанда Дмитрий бииргэ үөрэммит оҕолоро туруорбут «Чемпион» бензопила бириистэринэн наҕараадаланна.
II миэстэни С.А. Ноговицын, Ю.Л. Рощин, 9-с кылаас үөрэнээччитэ Леонид Сидоров хамаандалара, III миэстэни Н.П. Петров, Г.С. Иванов, 9-с кылаас үөрэнээччитэ Юрлен Никитин хамаандалара ыллылар.
Оҕолорго ойбон алларыыга I м. — Иванов Олимпий, II м. — Сидоров Леонид, III м. — Никитин Юрлен ыланнар, Сунтаардааҕы Аҕалар сүбэлэрэ туруорбут бириистэринэн наҕараадаланнылар.
«Муус Күүлэй-2023» күрэс тэрээһинигэр сүүрбүт-көппүт дьоҥҥо, спонсордаабыт тэрилтэлэргэ: «Сайдам» ХЭТ-кэ,
Саввинов Е.Е. ИП-га , «Христина», «Маяк»,
«Альфа», «Бетта», «Гамма», «Алина», «Туймаада» , «Аартык» маҕаһыын кэлэктииптэригэр, Дмитрий Николаевич аҕата Николай Алексеевичка, Дима бииргэ үөрэммит оҕолоругар,
Сунтаар Аҕаларын түмсүүтүн салайааччы Борис Уларовка, оскуола дириэктэрэ Л.Г. Никитинаҕа олохтоох дьаһалта махталын этэр, «бу күн ылыллыбыт муус нэһилиэкпит аҕам саастаах дьонугар, анал байыаннай дьайыы кыттыылаахтарын дьиэ кэргэттэригэр тиксэриллиэ» диэн иһитиннэрэр.
«Сунтаар сонуннара» хаһыат.