Тохсунньу 27 күнүгэр Арассыыйа уонна ДНР Дьоруойа Дмитрий Егоров төрөөбүтэ 50 сылын туолар.
Бүгүн биһиги Дмитрий Николаевич дьоруойдуу быһыытын ахтан-санаан ааһыаҕыҥ. Кини Ийэ дойдуга күүстээх таптала, бэриниилээх буолуу санаата баһыйан 2023 с. олунньуга баҕа өттүнэн анал байыаннай дьайыыга барбыта. Аҕата тоҕо барарын ыйыппытыгар “Эдэр 18–20 эрэ саастаах, ыал да буола илик уолаттар кыргыһыы хонуутугар сылдьаллар. Оттон мин кэннибэр хаалар уолаттардаахпын” диэбит. Сулууспалыыр кэмигэр бэйэтин саха саарына, хорсун-хоодуот саллаата буоларын бигэргэппит.
Дьоруойдуу быһыытын туһунан аан маҥнай Арассыыйа телеграм-ханаалларыгар “Сунтаар” диэн позывнойдаах соҕотоҕун өстөөх саллааттарын бөлөҕүн кытта сэриилэһэн кыайбытын туһунан видео тарҕаммыта. Бу манна Дмитрий Егоров Новомайорскай аттыгар өстөөх тирэх пуунун штурмалааһыҥҥа кыттыбыт. Өстөөх төһө да баһыйар ахсааннаах буолбутун үрдүнэн утарылаһааччыны төттөрү чугуппут, хорсун быһыытынан Украина сэбилэниилээх күүһүн сорох чааһын суох оҥорбут. Самныбат санаалаах саха саллаата дьоруойдуу кыргыһан, өстөөх тирэх пууна биһиги өттүбүтүттэн сүтүгэ суох ылыллыбыт. Хомойуох иһин балаҕан ыйын 9 күнүгэр 2023 с. Дмитрий Егоров ыараханнык бааһыран олохтон туораабыта.
Дьоруой сырдык аата үйэлэргэ сүппэт.
Алена ИВАНОВА