Бэҕэһээ, сэтинньи 8 күнүгэр, Сунтаар улууһун Аҕа баһылыга Анатолий Григорьев, үөрэҕирии управлениетын салайааччы Альберт Иванов, Сунтаар улууһун сайдыытын тус сыаллаах пуондатын салайааччы Прокопий Иванов уонна Элгээйи нэһилиэгин баһылыга Павел Григорьев анал байыаннай дьайыыга сулууспалыы сылдьар байыастарга гуманитарнай көмө тиэрдэр дэлэгээссийэлэрэ Москва куоракка тиийдэ.
Дэлэгээссийэ Москваҕа Саха сирин бастайааннай бэрэстэбиитэлэ Андрей Федотовы кытта көрүстэ. Анал байыаннай дьайыы кыттааччыларыгар туох көмө оҥоһулла турарын туһунан кэпсэттилэр. Анатолий Васильевич бу сырыыга улуус дэлэгээссийэтэ ханнык чаастарга тиийэрин уонна хайдах былаанынан үлэлиирин туһунан сырдатта. Улууспут бэрэстэбиитэллэрэ көрсүһүү кэмигэр волонтердар анал байыаннай дьайыы зонатыттан Арассыыйа Дьоруойа Дмитрий Егоров каскатын уонна бронежилетын постпредствоҕа аҕалан туттаралларыгар кытынныллар. Бу көрсүһүүгэ Сахабыт сирин бар дьоно-сэргэтэ уолбутун өйдүү-саныы сылдьалларын, кини дьоруойдуу быһыыта умнуллубатын курдук Дьоруой каскатын уонна бронежилетын Өрөспүүбүлүкэ түмэлигэр туттарарга диэн быһаарыыны ылыннылар.
Бу туһунан Сунтаар улууһун дьаһалтата Тг-каналыгар иһитиннэрэр.
«Сунтаар сонуннара» хаһыат.