Диспансеризация уонна ыарыыны сэрэтэр медицинскэй бэрэбиэркэ элбэх туһаны аҕалаллар. Сорох дьон үлэҕэ үтүрүйтэрэн, соло булбакка, доруобуйаҕа болҕомтону уурары наадалааҕынан аахпакка уо.д.а. төрүөттэринэн диспансеризацияны аахайбакка хаалаллар.
Бу дьаһал «Доруобуйа харыстабыла» национальнай бырайыак чэрчитинэн үлэлиир. Диспансеризацияҕа ыарыыны сэрэтэр медицинскэй чинчийии уонна сыстыгана суох дьарҕа ыарыылары, ыарыы сайдар кутталын буларга хайысхаламмыт чинчийии эбии ньымалара киирэллэр. Диспансеризация – хас биирдии киһи бэйэтин доруобуйатыгар кыһаллар бырааба. Диспансеризация 2 түһүмэхтэн турар, манна араагы эрдэ буларга туһуламмыт булгуччулаах онкоскрининг киирэр.
Биһиги улууспутугар бүгүҥҥү күн туругунан төһө киһи диспансеризацияны ааспытын туһунан улуустааҕы киин балыыһа ыарыыны сэрэтэр кэбиниэтин бырааһа Марина Андрееваттан ыйыталастым.
– Марина Борисовна, диспансеризацияны бүгүҥҥү күн туругунан хас киһи ааста? Быйылгы көрүүгэ хас сыллаахха төрөөбүттэр киирсэллэрий?
– Сэтинньи ый түмүгүнэн диспансеризация бастакы түһүмэҕин 5822 ааспыт, олортон 1072 киһи иккис түһүмэххэ ыытыллыбыттара.
Оттон профилактический медицинскэй көрүүнү 1459 киһи ааста.
Диспансеризацияны 18-тан 39-гар диэри саастаах дьон – үс сылга биирдэ, онтон 40-тан үөһэ саастаах дьон сыл ахсын көрдөрүөхтээхтэр. Ол аата, бу 2024 сылга 1985, 1988, 1994, 1997, 2000, 2003, 2006 сыллаахтар уонна 1983 сылтан аллараа саастаах дьон.
– Ыарыыны булуу, сэрэтии үлэлэрин түмүгүнэн ордук ханнык ыарыылар бэлиэтэнэллэрий?
– Бастакы миэстэҕэ хаан эргиирин систематын ыарыылара, иккискэ — сахарнай диабет уонна ас буһарар уорганнар, үһүс миэстэҕэ тыынар уорганнар ыарыылара ылаллар.
– Диспансеризацияны икки түһүмэҕинэн ыытыллар диэтибит. Түһүмэхтэринэн ыллахха, бэрэбиэркэҕэ ханнык көрүҥнэр киирсэллэрий?
– Бастакы түһүмэх чэрчитинэн көрүү, анкетирование, ыйытыы, антропометрия, хаан баттааһынын кээмэйдээһин, босхо кэлим чинчийии ыытыллар. Оттон икки түһүмэххэ бастакы сырыыга быһаарыллыбыт ыарыһахтар эбии чинчийиигэ быраастарга ыытыллаллар.
– Кэлиҥҥи сылларга диспансеризацияны барыыга уларыйыылар киирдилэр быһыылаах дии. Ол онтон биирдэстэрэ тэрилтэ үлэһитэ диспансеризация барар күнүгэр үлэтиттэн босхолонор диэн баара. Ол туһунан кылгастык ааҕааччыларбытыгар билиһиннэр эрэ.
– Сокуон быһыытынан (РФ үлэ кодексын 185.1 ыст.) үлэ биэрээччи үлэһитигэр диспансеризацияны ааһарыгар төлөбүрдээх өрөбүл күн биэрэр эбээһинэстээх.
– Диспансеризацияны тэҥэ өссө профилактическай медицинскэй көрүү диэн баар дии. Туох уратылаахтарый?
– Профилактическай көрүү 18-тан 39 саастарыгар диэри оҥоһуллар. Ол аата, 2024 сылга 1986, 1987, 1989, 1990, 1992, 1993, 1995, 1996, 1998, 1999, 2001, 2002, 2004, 2005 сыллаах дьоҥҥо ыытыллар. Манна анкетирование, антропометрия, харах, хаан баттааһынын кээмэйэ, ЭКГ, уопсай хаан анаалыстара, онкоцитология мазога, акушерка көрүүтэ, терапевт быраас сүбэтэ киирэллэр.
Босхо профилактическай көрүүгэ «Госуслуги» портал нөҥүө эбэтэр Доруобуйа харыстабылын биир ситимин нүөмэринэн – 122 нүөмэргэ эрийэн суруттарыахха сөп эбэтэр диспансеризация кэбиниэтигэр эрдэттэн суруттарбакка көрдөрүөххэ сөп.
Үлэлиир кэмэ: Оройуоннааҕы поликлиника, Ленина уул. 26 б, 3 этээс, 322 кэбиниэт.
Бэнидиэнньик-бээтинсэ 9:00-16:00 диэри (эбиэттиир кэмэ 13:00-14:00) уонна субуотаҕа 10:00-тан-13:00 диэри үлэлиир. Өрөбүл күн – баскыһыанньа.
– Марина Борисовна, иһитиннэрииҥ иһин махтал!
Яина ВЛАСЬЕВА