Бүгүн, саҥа тутуллан киирбит дьиэҕэ, Сунтаар нэһилиэгин дьаһалтатын өйөбүлүнэн доруобуйа харыстабылын үс үлэһитигэр үөрүүлээх түгэҥҥэ кыбартыыра күлүүстэрин туттардылар. Саҥа кыбартыыра хаһаайыттарын СӨ доруобуйатын миниистирин бастакы солбуйааччыта Дмитрий Сергин эҕэрдэлээтэ, саҥа кыбартыыра хаһаайыттарын көрсөн кэпсэттэ:
«Сунтаар нэһилиэгин дьаһалтатыгар доруобуйа харыстабылын эйгэтин үлэһиттэрин өйөөбүккүтүгэр махталбын биллэрэбин. Оттон саҥа кыбартыыра хаһаайыттарыгар тыа сирин дьонун-сэргэтин махталын, билиниитин ылаҥҥыт өр кэмҥэ доруобуйа харыстабылын эйгэтигэр ситиһиилээхтик үлэлииргитигэр баҕарабын».
Ол курдук, саҥа кыбартыыра хаһаайыттарынан киин балыыһа лор, эндоскопист, терапевт быраастара буоллулар.
Арина Спиридонова 2024с. «Земский доктор» тосхолунан дьиэ кэргэнин кытта Сунтаарга көһөн кэлэн, киин балыыһаҕа терапевт бырааһынан үлэлиир: «Биһиги кэргэммин кытта иккиэн Ньурба улууһуттан сылдьабыт. Икки оҕолоохпут. Үлэлиир тэрилтэбит олорор дьиэнэн хааччыйбытыгар махталбыт улахан. Саҥа олохторун оҥостон эрэр эдэр дьоҥҥо маннык көмө төһүү күүс буолар. Билигин туохха да мэһэйдэппэккэ үлэлиирбитигэр толору кыах баар. Онон ыччат дьон ыраах сиргэ кэлэн олохсуйаргытын, үлэлииргитин куттанымаҥ, тыаҕа да куорат курдук тэҥ усулуобуйа баар, өссө ордук!».
Сунтаар нэһилиэгин дьаһалтата утары баран, үлэһит эдэр дьону тыаҕа олохсутар санааттан доруобуйа харыстабылын үлэһиттэригэр саҥа кыбартыыраны үлэлиир кэмнэригэр босхо олороллоругар биэрдэ.
Мира АФАНАСЬЕВА