Элгээйи нэһилиэгин олохтоохторугар ураты үөрүүлээх күн тосхойдо. Ол курдук, Арассыыйа бэрэсидьиэнэ Владимир Путин көҕүлээбит «Доруобуйа харыстабыла» национальнай барыл иитинэн «Доруобуйа харыстабылын бастакы сүһүөҕүн саҥардыы» бырагыраамма көмөтүнэн амбулаторнай балыыһа дьиэтин арыйдылар. Бэлиэ түгэҥҥэ өрөспүүбүлүкэбит Ил Дархана Айсен Николаев быһа сибээс нөҥүө кыттыста. Кини былырыын Сунтаар улууһугар кэлэ сылдьан, эбийиэк бастакы көмүс сыбаайатын үөрүүлээх быһыыга-майгыга түһэрбитэ. Ону тэҥэ, СӨ доруобуйа харыстабылын миниистирин бастакы солбуйааччыДмитрий Сергин кэлэн, күндү ыалдьыт буолла.
Дьон доруобуйатын туруга тупсарыгар күнүһү-түүнү аахсыбакка, күн бүгүн түбүгүрэ сылдьар үрүҥ халааттаах аанньаллары уонна үлэлээн ааспыт ытык бэтэрээннэри дьоро тэрээһиҥҥэ чиэстээтилэр. Кинилэри СӨ доруобуйа харыстабылын миниистирин бастакы солбуйааччыта Дмитрий Сергин, улуус баһылыга Анатолий Григорьев уонна ыҥырыылаах ыалдьыттар үрдүк сыанаттан эҕэрдэлээтилэр.
Олохтоохтор туруорсууларынан улахан үлэ, элбэх кэпсэтии баран, өр кэмҥэ күүппүт баҕа санаалара олоххо киирдэ. Саҥа амбулаторнай балыыһаҕа олохтоох дьон эрэ буолбакка, чугас эркин сытар нэһилиэктэртэн тиийэ кэлэн көрдөрүнүөхтэрэ. Көрөр-истэр тэриллэр барыта аныгылыы тупсаҕай көрүҥнээхтэр. Ити үлэлииргэ олус табыгастаах. Маны тэҥэ, көрдөрүнээччи дьон улуус киинигэр киирэ сатаабакка, бу балыыһаҕа анализ туттарар уонна түмүгүн күнүнэн ылар кыахтаныахтара.
Толору хааччыллыылаах, аныгы ирдэбилгэ эппиэттиир эбийиэги бэдэрээтчик Иван Сахаров салайааччылаах «Северо-Восток Стройдизайн» хааччахтаммыт эппиэтинэстээх уопсастыба тутан киллэрдэ. Ону тэҥэ, олохтоох уолаттар монтаж үлэтин ылсан үлэлээтилэр.
Нэһилиэккэ доруобуйа харыстабылыгар эҥкилэ суох үлэлээбит бэтэрээн үлэһит Маргарита Заболоцкая үөрүүтүн үллэстэр: «Нэһилиэкпитигэр аан бастакы балыыһа 1957 с. арыллыбыта. Бырааһынан Анатолий Владимирович Захаров кэлэн үлэлээбитэ. Сопхуос үлэһиттэригэр диэн уопсай дьиэ бырайыагынан тутуллубут дьиэҕэ 1965 с. стационар үлэҕэ киирбитэ. Онтон, 1998 с. учууталлар уопсайдара саҥардыллан балыыһа дьиэтэ буолбута. Ол саҕана бэйэбит эпэрээсийэ араас көрүҥүн оҥорор уонна хат дьахталлары төрөтөр этибит. Ити кэмҥэ олус элбэх, баай уопуттаах быраастар үлэлээн ааспыттара. Урут нэһилиэнньэ ахсаана да элбэх буолан сылга 800-чэ оҕо төрүүр этэ. Ол кэннэ, сопхуос эстиэҕиттэн, дойдуга уларыйыы саҕаланыаҕыттан дьон аҕыйаан барбыта. Билигин балыыһабыт сэбиэдиссэйинэн Светлана Пантелеймоновна олус бэриниилээхтик үлэлии-хамсыы олорор. Ураты суолталаах күн үүммүтүнэн, саҥа амбулатория тутуллан киирбитигэр олохтоох дьон үөрүүбүт үгүс. Түгэнинэн туһанан махталбытын этэбит».
Өрөспүүбүлүкэ бэлиитикэтин биир сүрүн хайысхатынан дьон-сэргэ чөл доруобуйалаах буолалларын хааччыйыы уонна чөл олоҕу пропагандалааһын буолар. Онон нэһилиэк олохтоохторун доруобуйатын көрүүгэ-истиигэ бу саҥа дьиэ төһүү күүс буолара саарбаҕа суох.
Елизавета ТИТОВА