Кириэстээх нэһилиэгэ бастакы фельдшерскай-акушерскай пуун тэриллибитэ 75 сыллаах үбүлүөйдээх дьоро күнүн бэлиэтээтэ. Дьоро күн үөрүүлээх чааһа быраас Антонина Модестовна Далбараева балыыһа ааспыт кэмнэртэн бу күҥҥэ диэри олоҕун иһитиннэриитинэн саҕаланна. Култуура киинини үлэһиттэрэ устуоруйа быыһын сэгэтэн көрөр кэрэ бэлиэ дааталары ахтан аастылар. Кэлэктиип күүһүнэн инсценировка, “Балыктаах киэһэтэ”, “Журавли” үҥкүүлэр көрөөччү болҕомтотун тартылар. Бэлиэ күнүнэн ырыа-үҥкүү кэһиилээх эҕэрдэлии нэһилиэк “Иэйии”, “Кэрэли” вокальнай ансамбыллара, “Кустук” түмсүү, Альберт Данилов, Александра Никифорова, Аярона кэллилэр. Кэнсиэр чааһа кэлэктиип саҥа туруорбут дьүһүйүүтүнэн түмүктэннэ, араас кэмҥэ үлэлии сылдьыбыт үлэһиттэри, ыҥырыылаах ыалдьыттары үөртэ, сөхтөрдө. Ону сэргэ балыыһа устуоруйатын сырдатар раритет мал, тэрил быыстапката, бэтэрээн үлэһиттэригэр аналлаах истиэндэ турдулар, слайдынан презентация ситэрэн-хоторон биэрдэ.

 

 

 

Балыыһа улууска биир бастыҥ көрдөрүүлээх эмп тэрилтэтэ. Үбүлүөйүнэн нэһилиэк аҕа баһылыга Александр Григорьев, улуустааҕы тыа хаһаайыстыбатын управлениетын начальнига Владимир Анисимов, Сунтаар улууһун кииннэммит балыыһатын кылаабынай бырааһа Константин Павлов, улуустааҕы киин балыыһа кылаабынай бырааһын солбуйааччы Ньургустана Тимофеева, улуустааҕы киин балыыһа кылаабынай сиэстэрэтэ Саргылана Герасимова, Куокуну нэһилиэгин аҕа баһылыга Леонид Михалев, нэһилиэк тэрилтэлэрин салайааччылара эҕэрдэ тылларын, бэлэхтэрин-туһахтарын, үлэ дьонун чиэстээн наҕараадалары туттардылар. 1973-1985с.с. Кириэсттэхтээҕи ФАП сэбиэдисээйигэр, 39 сыл устата доруобуйа харыстабылын эйгэтигэр үлэлээбит бэтэрээн биэлсэргэ Евдокия Семеновна Петроваҕа «Кириэстээх нэһилиэгин Бочуоттаах олохтооҕо» ытык аат иҥэрилиннэ.

Саха Өрөспүүбүлүкэтигэр, Сунтаар улууһугар, нэһилиэккэ доруобуйа харыстабылын сайдыытыгар үрдүк көрдөрүүлээх өр сыллаах таһаарыылаах үлэлэрин, киллэрбит кылааттарын, үтүө суобастаах үлэлэрин иһин наҕараада туппут дьоммутун эҕэрдэлиибит. Үрүҥ халааттаах дьоммут түмсүүлээх буолан нэһилиэккэ үлэ күөстүү оргуйар, олох тэтимэ күүһүрэр, инникигэ эрэлбит улаатар.

Үөрүүлээх тэрээһин үһүс чааһыгар, маанылаах сандалы остуол тула уруккуну-хойуккуну санаһан, ол ыраах кэмҥэ төннөн ыллылар, баҕа санаа бастыҥын анаатылар. Манна салҕыы Үлэ дьоруойа Владимир Африканович Михайлов, «Кириэстээх» ТХПК дириэктэрэ Владимир Семенович Егоров, үлэ бэтэрээнэ Анатолий Прокопьевич Иванов, «Кустук» түмсүү, бэтэрээн үлэһиттэр, Бүлүүчээнтэн, Тойбохойтон, Куокунуттан, нэһилиэк тэрилтэлэриттэн ыалдьыттар ирэ-хоро кэпсэтэн, ыллаан-туойан, эҕэрдэ, махтал үтүө тылларын анаан тарҕастылар. Маанылаах киэһээ ыытааччыта Жанна Макаринская, үөрүүлээх чааһы иилээн-саҕалаан ыытта Августина Платонова.

75 сыллаах бэлиэ үбүлүөйүнэн амарах санаа аргыстаах, дьон-аймах доруобуйатын туһугар туруулаһан үлэлиир кэлэктииби эҕэрдэлиибит, өссө да ситиһиилээх үлэни, саҥаттан саҥа саҕахтары, арыйыылары баҕарабыт.

Людмила ДАНИЛОВА

Читайте дальше