«Дорбой» оҕуруот аһын үүннэриигэ ыччат биригээдэтэ тэриллэн үлэлээбитэ быйыл 70 сылын бэлиэтээри бэлэмнэнэбит. Бу бэлиэ түгэнинэн, оччолорго «Дорбойго» агрономунан үлэлээбит «Сунтаар» сопхуос бэтэрээн үлэһитэ, биһиги ытыктыыр наставникпыт Елена Сидорова тэрийиитинэн бэрт көрсүһүү буолла. Көрсүһүүбүт «Партизан» НАТК балаҕаныгар ыытылынна. Манна оччолорго оҕуруот аһын үүннэриигэ үлэлээбит эдэркээн кыргыттар, уолаттар, билигин аҕамсыйбыт, араас эйгэҕэ үлэ бөҕөнү үлэлээн бочуоттаах сынньалаҥҥа олорор дьон мустаммыт, урукку кэмнэри истиҥник санастыбыт, 70 сыллаах үбүлүөйбүтүгэр эдэр сааспытыгар үлэлээн ааспыт «Дорбойбут» туһунан үйэтитэр үлэни ыытарга сүбэлэстибит.
Бу күн биһиги, ааспыт өттүгэр оҕуруот үүннэриитигэр үлэлээбит дьон, байыаннай дьайыыга сылдьар байыастарбытыгар анаан аҕалбыт сэмэй көмөбүтүн волонтер Людмила Филипповаҕа туттардыбыт. Манна даҕатан эттэххэ, Людмила Афанасьевна оскуола үөрэнээччитин эрдэҕиттэн «Дорбойго» үлэлээбитэ, таһаарылаах үлэтинэн мэтээл ылбыта. Билигин да кыыспыт Людмила олоххо көҕүн ыһыктыбакка, байыастарга анаан хаххалыыр сиэккэни оҥорууга күннэтэ үлэлэһэриттэн биһиги үөрэбит.
Надежда ЕВСЕЕВА