Олунньу 16 күнүгэр, дьоллоох Дьокуускай куоракка биир дойдулаахтарбыт кыттыылаах “Сунтаартан ырыа кэһиилээх” диэн айар түһүлгэлэрин “Сэргэлээх уоттара” култуура дьиэтигэр төрүттээтилэр. Тэрээһин сүрүн көҕүлээччитинэн “Одун” култуура киинин салайааччыта Василий Васильев уонна кини халыҥ хамаандата буолар. Василий Васильев бу бырайыагын үлэлэппитэ син ыраатта: “Этиэҕи баҕарыллар, Дьаархан нэһилиэгэ айылҕаттан талааннаах, айар куттаах дьонунан улууска да өрөспүүбүлүкэҕэ да киэҥник биллэр, аатырар. Төһө да билигин нэһилиэкпитигэр култуурабыт дьиэтин өрөмүөҥҥэ бэлэмниирбитинэн үлэлиир сирэ суох буолларбыт, култуура үлэһиттэрэ айар үлэбитин тохтоппоппут. Билигин нэһилиэк успуордун манеһыгар муннукка олорон үлэлииргэ күһэллэбит. Ол эрэн, санаабытын түһэрбэппит. Айар бырайыактарбытынан нэһилиэктэри кэрийэбит, чугас эргин улуустарга ыалдьыттыыбыт.Тыйаатыр күрэстэригэр ситиһиилээхтик кыттабыт. Онтон бу күннэргэ Дьокуускай куоракка Сунтаартан төрүттээх талааннаах дьон кэнсиэрин бэлэх ууннубут ”. Кэнсиэр буолар күнүгэр “Сэргэлээх уоттара” култуура дьиэтигэр өрөспүүбүлүкэҕэ киэҥник биллэр Дархан этээччи, 2024 сылга Оһуокайга Ил Дархан стипендиата Лариса Иванова кыттыылаах улахан оһуокай түһүлгэтэ тэрилиннэ. Ону тэҥэ, Сунтаар астаан-үөллээн оҥорор тэрилтэлэрин атыы-эргиэн дьаарбаҥката ыытылынна. Манна Сунтаарга оҥоһуллар ас-үөл арааһын куораттар хамаҕатык атыыластылар.
Суруналыыс Владислав Коротов биир дойдулаахтарын кэнсиэригэр сылдьыбытын туһунан санаатын таһаарабыт: “Бүгүн дойдум ахтылҕанын таһааран, «Сунтаартан ырыа кэһиилээх» диэн бэрт сонун, сэргэх кэнсиэргэ сылдьан кэллим. Сунтаар Дьаарханын кулуубун салайааччыта Василий Васильевич Васильев көҕүлээһининэн, Сунтаартан төрүттээх биллэр ырыаһыттары тэҥэ бассаабынан ырыалара киэҥник тарҕаммыт, саха дьонун биһирэбилин норуот ырыаһыттара — бүгүн сыанаҕа тахсыан иннинэ Тырахтарыыс уола диэн айар аат ылыммыт, кэрэ аҥаардары абылыыр куоластаах Вячеслав Тимофеев, сылгыһыттар түмсүүлэриттэн «албан аатырбыт» Станислав Архипов-Сылгыһыт Ыстаас, уонна тэтимнээх үҥкүүлээх, сэргэх хамсаныылардаах Александр Васильев сайаҕас ырыаларын истэн бэркэ астынныбыт, дуоһуйдубут. Кэнсиэри иилээн-саҕалаан Саха сиригэр Һунтаар — Олоҥхо дойдута баарын күннэтэ Саха тэлэбиидэнньэтигэр, социальнай ситимнэргэ барытыгар кэпсии, көрдөрө, хайҕыы сылдьар маанылаах кыыспыт Тускулаана Гоорхова-Кобельянова ыытта”.
Дьаархантан төрүттээх, Сунтаартан сыдьааннаах Наталия Сивцева кэнсиэр туһунан санаатын маннык үллэстэр: “Бүгүн дьоллоох Дьокуускай куоракка төрөөбүт төрүт дойдубутуттан, чуолаан Дьаархантан сыдьааннаах киэн туттар ырыаһыттарбыт «Сунтаартан ырыа кэһиилээх» кэнсиэртэрэ олус истиҥник, өрө көтөҕүллүүлээхтик ааста. Дойдубут дьонун ылбаҕай ырыаларын истэн, нохтолоох тойон сүрэхпитигэр киллэрэн, дойдубут ахтылҕанын таһааран, дууһалыын сылаанньыйан, сыалыһар быарыныы сымнаан, уоскуйан-налыйан, өрө да күүрэн ыллыбыт. Кэнсиэри иилээн-саҕалаан ыыппыт түсчүт Тускулаана Горохова-Кобельянова саҥаран-иҥэрэн, салайа тутан, кэнсиэри өссө киэргэттэ. Махтанабын, бу маннык үтүө түһүлгэни тэрийбит Үс Бааскаҕа бу курдук дойдугун ааттатан, араас түһүлгэлэри тэрийэргэр. Дьаархаттар хайа үрдүгэр буоллубут. Киэн тутуннубут ырыа ымыылаах, кэрэ куоластаах дьоммутунан, өрүүтүн бу курдук көмүс куоласкытынан ыллаан-туойан, дьоҥҥо үөрүүнү-көтүүнү, дьолу бэлэхтии, киэҥ түһүлгэни төрүттээн үтүөнү түстүү сылдьыҥ! Тускуо!”
Мира АФАНАСЬЕВА
Владислав КОРОТОВ хаартыскаҕа түһэриитэ
