Ааһан эрэр сылга Арассыыйа үрдүнэн тыа хаһаайыстыбатыгар саҥа сокуон олохтонон, кулун тутар 1 күнүттэн дьиэ кыылларын бары көрүҥэр маркировка булгуччулааҕын, итиэннэ «Ветис» Судаарыстыбаннай Федеральнай бэтэринээрнэй информационнай систиэмэҕэ (ФГИС) учуокка туруохтаахтарын туһунан ааспыт ыйга ааҕааччыларбытыгар сырдатан турабыт. Ити эрээри, сорох дьон маны ситэ ылына илик түбэлтэлэрэ эмиэ баар. Маныаха, маркировка уонна учуот тоҕо булгуччулааҕын сиһилии билистибит. Бу туһунан Сунтаардааҕы тыа хаһаайыстыбатын управлениетын начальнига Владимир Анисимов уонна сүрүннүүр зоотехнига Маргарита Яковлева маннык иһитиннэрэллэр.
— Бастатан туран, идентификационнай-хатыламмат нүөмэр (судургутук чип) хас биирдии дьиэ кыылыгар баар буолара хаһаайын эбээһинэһэ. Бу – дойду үрдүнэн ынах-сүөһү, сылгы о.д.а. ахсаанын сааһылааһын биир көрүҥэ буолар. Төбө ахсаана улууска төһө баара «Хорриот» систиэмэҕэ регистрацияланан чип дааннайынан биллэр. Судаарыстыбаттан көрүллэр көмө харчылар ити дааннайга олоҕуран көрүллэллэр. Ону тэҥэ, бу сокуон хаһаайыттарга бэйэлэригэр табыгастаах. Холобур, дьиэ кыыла сүтэр, өлөр түбэлтэтигэр уонна өҥө-түүтэ уларыйан хаһаайын билбэт түгэнигэр чип көмөтүнэн буларга олус судургу буолар.
Ирдэбил быһыытынан тыа хаһаайыстыбатын кыылларын маркировкалааһын уонна учуот үлэтэ болдьохтоох. Маныаха, сибилиҥҥи туругунан Сунтаарбыт улууһа өрөспүүбүлүкэ үрдүнэн бытаан хаамыылаах, мөлтөх көрдөрүүлээх олорор. Сокуону толорууга бары үлэлэһиэхтээхпит. Тыа хаһаайыстыбатын управлениета манна быһаччы сибээстээх буолан хонтуруоллаһабыт. Манна утарылаһар төрүөт суох. Ким да сүөһүнү, сылгыны былдьаабат. Онон, дьиэ кыылын иитэр хаһаайыттар судаарыстыбаттан көмө ылар буолан баран, судаарыстыба ирдиирин эмиэ тутуһуохха наада.
Елизавета ТИТОВА
Хаартыска куйаар ситимиттэн туһанылынна