Соторутааҕыта дойду тэбэр сүрэҕэр, Москуба куоракка «Национальное Достояние России» Бүтүн Арассыыйатааҕы куонкурус буолан ааста. Манна биһиги улууспут кэскиллээх чинчийээччитэ, Сунтаардааҕы политехническэй лиссиэй-интэринээт 9-с кылааһын үөрэнээччитэ Давид Зорин экология хайысхатыгар кыайыылаах тахсан, түөскэ кэтэр үрүҥ көмүс бэлиэнэн наҕараадаланна. Кини «Изучение изменения экологического состояния и реализация очистки озера Тумусукан села Сунтар» диэн чинчийэр үлэтинэн кытынна. Бу үлэни күөл кытыытын кыйа «Сквер экологов» сынньанар былаһаакка тутуллан суруйарга санаммыт. Ону тэҥэ, күөл туругун биоиндикация ньыматынан үөрэтэн көрөр сыаллаах чинчийдэ. Салгыы ырааһырдыы үлэтин олоххо киллэрэргэ дьулуһар. Бэлиэтээн эттэххэ, Давид былырыын бу үлэтигэр СӨ Экология миниистирин анал бирииһин туппута. Ону тэҥэ, научнай үлэҕэ үрдүк ситиһиилэрин иһин сыллата СӨ Билимин аччыгый академиятын чилиэнинэн талыллар. Салайааччы Диана Прокопьева кэпсииринэн, маннык үрдүк таһымнаах куонкуруска В.П. Ларионов аатынан «Инникигэ хардыы» өрөспүүбүлүкэтээҕи научнай конференцияҕа ситиһиилээхтик кыттан, сүүмэрдээһини ааһан, ыҥырыы туталлар эбит.
Елизавета ТИТОВА