Бырааһынньыктааҕы өрөбүллэргэ «Дархан» кафе-ресторан оҕолорго пицца уонна үүт коктейлин астааһыныгар маастар-кылааһы тэрийдэ. Маастар-кылааһы «Пятница» телеканал «Битва шефов» биэрии, Москва, Дьокуускай куораттар ас бэстибээллэрин кыттыылааҕа шеф-повар Исмаил Мамутов ыытта. Икки күн маастар-кылааска оҕо толору сырытта. «Дархан» кафе салайааччыта, урбаанньыт Денис Павлов:«Өрөспүүбүлүкэҕэ олус үчүгэй ис хоһоонноох Оҕо саас сылын биллэрбиттэрин биһирии истибитим. Биһиги рестораммыт торумунан дьиэ кэргэҥҥэ үтүө сынньалаҥы тэрийии буолар. Исмаил Мамутов Дьокуускай куоракка биллэр ааттаах-суоллаах, идэтийбит шеф-повар. Ресторан арыллыытыгар менюбутун оҥорорго көмөлөспүтэ. Билигин эмиэ рестораҥҥа саҥа уларыйыылары киллэрэргэ үлэлэһэ сылдьабыт. Ол курдук, менюбутугар саҥа бүлүүдэлэр баар буолуохтара. Ону таһынан, үлэһиттэрим таһымнарын үрдэтэргэ кыһаллабын.Үлэһиттэр шеф- повартан араас албастарга үөрэнэллэр. Исмаил Мамутов Сунтаарга 2 ый үлэлиэҕэ. Нэһилиэнньэҕэ анаан араас маастар кылааһы тэрийиэҕэ. Түгэнинэн туһанан «Дархан» ресторан ыытар маастар-кылаастарыгар көхтөөх кыттыыны ылыҥ диэн ыҥырабын».
Маастар кылаас кэнниттэн оҕолор үөрүүлэрэ үгүс. Алима Данилова 2-с кылаас үөрэнээччитэ: «Мин астыырга саҥа үөрэнэн эрэбин. Пиццаны «каталката»суох астыахха сөп эбит диэн биллим. Илиигин манкаҕа биһэн баран тэнитэр эбиккин. Дьиҥнээх «итальянецтар» курдук астаатыбыт. Пиццабыт олус минньигэс буолла. Шеф повар күлэ-үөрэ үөрэтэр буолан, маастар-кылааспыт бэһиэлэйдик ааста«, — диэн санаатын үллэстэр.
Денис Павлов — Сунтаарга биллэр урбаанньыт. Араас интэриэһинэй бырайыагы олоххо киллэрэргэ дьулуһар. Кини «Сунтаарга киин куорат таһымыгар эппиэттиир дьиэ кэргэнинэн сынньанар сирдэр элбииригэр баҕарабын» диэн санаалаах үлэтин ыытар.
Мира АФАНАСЬЕВА