Бүгүн, А.И.Иванов аатынан Олимпийскай эрэллэри бэлэмниир оскуола манеһыгар, улуус уонна нэһилиэк дьаһалталарын үлэһиттэрин икки ардыларыгар ыытыллар бэстибээл буолла.
Ол курдук, быйыл 2-с төгүлүн ыытыллар бэстибээл «Вместе – Мы сила» диэн ааттанан уопсайа 26 хамаанданы түмэ тарта. Бэстибээл үөрүүлээх арыллыытыгар хас биирдии дьаһалта кыттааччылара нэһилиэктэрин дьарылыгын, былааҕын күөрэччи тутан сэлэлии хааман киирдилэр. Тэрээһини улуус баһылыгын 1-кы солбуйааччыта Павел Григорьев истиҥ эҕэрдэтинэн арыйда уонна быйылгы бэстибээл сүрүн соруга сомоҕолоһуу буоларын бэлиэтээн эттэ. Бэстибээлгэ 25 нэһилиэк уонна улуус дьаһалтатын үлэһиттэрэ барыта 6 көрүҥҥэ өрө күүрүүлээхтик күрэхтэстилэр. Манна дьүүллүүр сүбэ хас биирдии көрүҥҥэ күрэх быраабылатын билиһиннэрэн, олус эппиэтинэстээхтик сыаналаатылар. Ол курдук, дуобат көрүҥэр 1-кы миэстэни Сунтаар улууһун дьаһалтата, 2-с миэстэни Кириэстээх нэһилиэгин дьаһалтата, 3-с миэстэни Түбэй-Дьаархан нэһилиэгин дьаһалтата ыллылар. Дартс көрүҥэр, 1-кы миэстэҕэ Сиэйэ, 2-с миэстэҕэ Аллыҥа, 3-с миэстэҕэ Элгээйи нэһилиэгин дьаһалталара таҕыстылар. Остуол тиэниһигэр, 1-кы миэстэ Хадан, 2-с миэстэ Сиэйэ, 3-с миэстэ Күндэйэ буоллулар. Сахалыы төрүт остуол оонньууларыгар — өҥнөөх хабылыкка 1-кы миэстэ Кэмпэндээйи, 2-с миэстэ Тойбохой, 3-с миэстэ Кириэстээх хамаандата таҕыстылар. Оттон, эбиэт кэнниттэн буолбут оҕунан ытыыга, 1-кы миэстэ Бүлүүчээн, 2-с миэстэ Элгээйи, 3-с миэстэ Куокуну хамаандалара тигистилэр. Бэстибээл «Көрдөөх старт» көрүҥүнэн түмүктэннэ. Бу көрүҥҥэ, 1-кы миэстэ Маар-Күөл, 2-с миэстэ Бордоҥ, 3-с миэстэ Күндэйэ хамаандата илин-кэлин түстүлэр.
Сүрдээх тыҥааһыннаах күрэх уопсай түмүгүнэн, 1-кы миэстэни Бүлүүчээн нэһилиэгэ ылла, 2-с миэстэни Кириэстээх, 3-с миэстэ Тойбохой ылан үөрүүлэрэ үксээтэ. Кыттааччылар сыаналаах бирииһинэн наҕараадаланнылар.
Маны тэҥэ, хас биирдии нэһилиэк ас амтаннааҕын сиэдэрэйдик симээн, баай сандалы тула тэлгэттилэр. Бу курдук, сылы түмүктүүр биир бастыҥ тэрээһин үрдүк таһымнаахтык ыытыллан, кыттааччылар сүргэлэрэ көтөҕүллэн тарҕастылар. Маннык бэстибээл үгэс быһыытынан сыл аайы ыытыллара былааннанар.
Елизавета ТИТОВА