Олохтоох бибилэтиэкэ тэрийиитинэн «Сир уустарыгар» үлэлии турар «Күн-Эко» лааҕырга (сал. Гуринова Н. С.) Саха сирин бастакы бэрэсидьиэнэ Михаил Ефимович Николаевы кэриэстиир тэрээһин буолан ааста.
Оҕолор чулуу киһибит олорбут олоҕун-дьаһаҕын, Өрөспүүбүлүкэ сайдыытыгар киллэрбит сүҥкэн кылаатын туһунан билистилэр. Михаил Ефимович Кэмпэндээйигэ кэлэ сылдьыбыт хаартыскаларын, киинэлэрин көрдүлэр. Кини нэһилиэкпит туһунан бу курдук эппитэ: «Биһиги өрөспүүбүлүкэбитигэр бэрт элбэх кырыы нэһилиэктэр бааллар. Олор ааттарын эһиги билбэт буолуохтааххыт, баһыйар үгүстэрэ, онтон ханна да сылдьыбыт иһин Кэмпэндээйи аатын саха дьоно бары билэллэр». Туус, чох, цеолит, эмтээх бадараан баар буолан бырамыысыланнай нэһилиэк буоларбытын бэлиэтээбитэ. Ыһыллыы-тоҕуллуу саҕана аат эрэ харата үлэлии турбут санаторий, бырамыысыланнай тэрилтэлэргэ туһааннаах дьаһаллары ылан сайдалларыгар күүс биэрбитэ. Оҕолорго виртуальнай үөрэх туһунан этиитин тоһоҕолоон көрдөрдүм. Оччолорго, интэриниэт ситимэ сайда илигинэ үөрэх технологиялара күүскэ сайдан «кэмпэндээйилэр дьиэҕэ олорон Санкт Петербург, Москва виртуальнай университеттарыгар» үөрэниэххит диэбитин сөҕө истибиппит. Михаил Ефимович саха норуотун духуобунай сайдыытыгар кылаата үгүс. Манна 2001 сыллаахха кэлэ сылдьан «Биһиги нация интэриэһин бэйэбит тус интэриэспититтэн өрө тутуох тустаахпыт. Оччоҕуна эрэ омук быһыытынан сайдыахпыт. Өскө нация интэриэһин көрбөт буоллахха, аҥардас бэйэ ыараханыгар, онно эрэ сигэнэн, онон боппуруоһу быһаарар буоллахпытына, бу кэскилэ суох, кыайан сайдыбат, кырдьыбыт нация курдук буолар түгэҥҥэ, быһыыга-майгыга киириэхтээхпит» диэн этиитэ билигин да күүскэ турар.
Оҕолор улуу киһибит этиилэрин, Кэмпэндээйигэ кэлэ сылдьан оҕолору, олохтоохтору кытары ааһан иһэн тохтоон, атах тэпсэн олорон, кэпсэтэн-ипсэтэн, санааларын истэрин киинэҕэ уһуллан хаалбытын көрдүлэр. Манна сылдьан Михаил Ефимович олохтоох түмэлгэ киирэн ааспыта. Түмэли тэрийбит үтүө кырдьаҕастарбыт Ксения Григорьевна, Мария Афанасьевна Евсеевалар сахалыы сиэринэн итии чэйдээх, алаадьылаах көрсүбүттэрэ. Кинилэри кытары оччотооҕу кулууп дириэктэрэ, билигин «Арассыыйа ийэлэрин» түмсүү салайааччыта Любовь Николаевна Осипова ол түгэни ахтан оҕолорго кэпсээтэ.
Түмүккэ лааҕыр оҕолоро Саха сирин бастакы бэрэсидьиэнэ Михаил Ефимович олоҕун-дьаһаҕын туһунан биктэриинэ ыйытыктарыгар эппиэттээтилэр, биир мүнүүтэҕэ чуумпуран иһийэн туран улуу киһибитин кэриэстээтибит.
Татьяна МЕСТНИКОВА, бибилэтиэкэр.