Сунтаардааҕы 3-с нүөмэрдээх орто оскуола үөрэнээччитэ Леонид Павлов «Азия оҕолоро» оонньууларыгар Саха сирин иккис хамаандатыттан көҥүл тустууга киирсиэҕэ. Кини оонньуулар саҕаланыахтарын иннинэ санаатын маннык үллэһиннэ:
«Бу «Азия оҕолоро» оонньууларга үчүгэйдик бэлэмнэммитим, 4 түһүмэхтээх сүүмэрдээһини Кыргызстаҥҥа, Казахстаҥҥа, Каспийскайга уонна Алдаҥҥа ааспытым. Олорор, эрчиллэр сирбит олус үчүгэй, аһаталлара олус минньигэс.
Оонньууга кытта элбэх омук кэлбит, олору кытта билиҥҥитэ билсиһэ иликпин. Ол эрээри бу күннэргэ билсиэм дии саныыбын. Күрэхтэһиибит бэс ыйын 28 күнүттэн саҕаланар. Оонньууларга кыттан өрөспүүбүлүкэбин, хамаандабын чиэстээхтик көмүскүүргэ оҥостон сылдьабын».
Дмитрий ЫМЫЧАНОВ