Бүгүн олунньу 9 күнэ – аан дойдуга стоматолог күнэ бэлиэтэнэр. Эрэдээксийэбит бүгүҥҥү ыалдьыта Сунтаарбыт киин балыыһатыгар тиис бырааһынан үлэлиир — Елена Гриц.
Елена Викторовна Сунтаарга Ольга Назарова уонна Виктор Уваровскай дьиэ кэргэҥҥэ күн сирин көрбүт. Гимназияны ситиһиилээхтик үөрэнэн 2006 с. бүтэрбит. Оҕо эрдэҕиттэн быраас буолар баҕалаах кыысчаан куукулаларын эмтээн оонньуура уонна хирург буолуом диэн ыра санаалааҕа. Оскуола кэмнэрэ элэс гынан ааһан, ийэтин сүбэтинэн стоматологическай факультекка стоматолог идэтигэр үөрэнэ киирэргэ бигэтик быһаарыммыт. 2014 сыллаахха ХИФУ мэдиссиинэ институтугар үөрэнэн быраас идэтин баһылаабыт. 2015 с. интернатуратын Дьокуускайга ааһан дойдутугар Сунтаарга стоматология отделениетыгар үлэлии кэлбитэ. Кэлэктииби эрдэттэн билэр буолан олус сөбүлээбит. Кини быйыл тапталлаах идэтинэн үлэлээбитэ номнуо 10 сыл буолбут.
Елена 3 оҕо амарах ийэтэ, тапталлаах кэргэн. Эдэр ийэ илиинэн араас
оҥоһуктары оҥорорун чуолаан баайарын олус сөбүлүүр. Түбүктээх үлэ быыһыгар иллэҥ кэм баар буолла эрэ дьиэ кэргэнигэр оҕолоругар аныырга дьулуһар. Ол курдук, киэһэтин бары остуол оонньууларын оонньуур үтүө үгэстээхтэр. Ону тэҥэ массыыналарынан кэргэнинээн уһун айаҥҥа Сахабыт сирин, Арассыыйа куораттарынан сылдьан сынньаналларын туохтааҕар да ордороллор.
Киһи-аймах чэгиэн олоҕун түстүүр суолталаах идэ бырааһыттан билигин дьон тииһин доруобуйата хайдаҕын уонна туох, ханнык сүбэни биэриэҥ этэй диэн туоһуластым.
«Билигин стоматология сайдан, дьон тииһин эмтэтэрин куттаммат буолбута үөрдэр. Оҕолор өйдөөн, бэйэлэрэ кыһаллан тиистэрин көрүнэ сылдьаллара элбээбит. Тиис доруобуйатын өттүнэн ылан атын улуустары кытта тэҥнээн көрдөххө, мөлтөх соҕус. Бу манна араас фактор дьайар: аһыыр аспыт, гигиена о.д.а. Иһэр уубут фторун састааба кыра буолан оҕолор тиистэрин эмалэ чараас, кэбирэх баҕайы. Көрдөрө кэлэргэ сатаан суруйтарбаттарыттан уһаан, кэҥээн хааллаҕына эмиэ уустугуруу барар. Сунтаарга төлөбүрдээх атын клиника суох буолан киин балыыһа стоматологията дьону үксүн эмтээн олорор. Онон стоматология баттыга (нагрузката) олус элбэх. Стоматолог идэлээхтэр тиийбэттэр. Доруобай тиис — доруобуйа төрдө буоларынан сүрүн маннык сүбэлэри биэриэм этэ. Бастатан туран, айах гигиената булгуччу тутуһуллуохтаах. Сороҕор тиистэрин хайдах сууналларын билбэт оҕолор баар буолааччылар. Оннукка үөрэтэн көрдөрөн биэрэбит. Оҕо тииһин эрдэттэн көрүнэригэр кыра сааһыттан үөрэтии. Тиис бырааһыгар былааннаан профилактическай көрдөрүүгэ 6 ыйга биирдэ сылдьыахтааххыт. Кыра оҕолор тиистэрэ ыалдьарын кэтэспэккэ эрдэттэн көрдөрөр ордук. Оччоҕо оҕо стоматологтан куттаммакка эрэнэн эмтэтэр буолар. Суруттарыы билигин барыта интэриниэт ситимин госуслуга эбэтэр Кврачу сыһыарыы нөҥүө барар. Онон бэйэҕит суруйтаран кэлэн консультациялаһыаххытын сөп».
— Елена бүгүн идэлээх бырааһынньыкытынан истиҥник эҕэрдэлиибин, кэпсээниҥ иһин махтанабын.
Алена ИВАНОВА