Бэҕэһээ, кулун тутар 13 күнүгэр, Бырабыыталыстыба дьиэтигэр «Будущий дипломат-2024» өрөспүүбүлүкэтээҕи куоҥкурус үөрүүлээх сиэрэ-туома ыытылынна. Тэрээһин ыччакка патриоттуу өйү-санааны иитиигэ, Арассыыйа тас политикатыгар, аан дойду сыһыаннаһыыларыгар уонна оҕолор идэни талыыларыгар болҕомтону тардыы буолар.
Инники түһүмэххэ саамай бастыҥ түмүктэри көрдөрбүт 54 оскуола үөрэнээччитэ быһаарыллыбыт. Кинилэр «Кыра лига» (18 кыттааччы), «Улахан лига» (36 кыттааччы) арахсан икки күн устата норуоттар икки ардыларынааҕы сыһыаны кытта сибээстээх араас тиэмэлэргэ дьүүллэһэн, бэйэлэрин билиилэрин-көрүүлэрин, сатабылларын көрдөрдүлэр.
Ол курдук, биһиги улууспутуттан Сунтаардааҕы политехническай лиссиэй 9-с кылааһын үөрэнээччитэ Федот Алексеев бастакы истиэпэннээх дипломант буолла. Оҕобутун үрдүк ситиһиитинэн истиҥник эҕэрдэлиибит, инникитин үрдүк дабайыылары баҕарабыт!
Сунтаар улууһун үөрэҕириигэ управлениетын пресс-сулууспата
