Бордоҥҥо «Айыллаан» СКК Культура колледжын устудьуона Анастасия Веригина дипломнай үлэтэ — «Дьиэ кэргэн -үрдүк анал!» фотосессия-кэнсиэрэ бэрт сонуннук тэрилиннэ. Дьиэ кэргэн сылыгар аналлаах кэнсиэркэ Бордоҥ талааннаах дьиэ кэргэттэрэ, ону сэргэ Күндэйэттэн, Сунтаартан ыалдьыттар кыттыыны ыллылар.
Саҕаланыыта дьиэ кэргэн туһунан теневой видео, онтон Бордоҥ кырачааннара дьиэ кэргэн туһунан тус санаалара экраҥҥа көһүннэ. Дьэ, ол кэннэ быыс аһыллыыта сценаҕа Анастасия Веригина ийэтэ Наталья Никандровналыын гитаранан ырыаларын бар-дьоҥҥо бэлэхтээтилэр, кэлбит көрөөччүлэргэ махтанан режиссер быһыытынан театрализованнай туруоруутун билиһиннэрдэ.
Кэнсиэри Петровтар дьиэ кэргэттэрэ аспыттара ордук суолталаах буолла. 50 сыл бииргэ олорбут, 14 оҕону төрөппүт герой ийэ Галина Егоровна Афанасий Гаврильевич көмүс кыһыл көстүүмнээх күлүмүрдээн тахсан оҕолорун-сиэннэрин кытта сценаны тобус-толору туран ыллаабыттара долгутта.
Ол кэннэ Айыыһыт тойугун бииргэ төрөөбүт Елизавета Мария Евсеевалар толордулар, Людмила Стручкова сиэн кыргыттарын кытта күн бытархайын ыстылар. Екатерина Индеева оҕолоро Ариналыын Аманныын, Ольга Гаврильевна кыыһа Нарынчаана Тереясовалыын, Сардана Егоровна оҕолоро Анеля Роберт Удиннар уо. д. а. бииртэн-биир нүөмэри көрөөччүлэр ытыс тыаһынан сэргии-кэрэхсии көрдүлэр.
Күннээх Күндэйэттэн Ксенья, Василий Саввиновтар ырыалара сүрэҕи долгутта, София Семен Максимовтар сценкаларыттан дэлби күлэн көрөөччүлэр үйэлэрэ биллэ уһаата. Сунтаартан ыалдьыттарбыт — «Сунтаар сонуннара» хаһыат кылаабынай эрэдээктэрэ Юлия-Айархаана Алексеева кэргэнэ ОДьКХ кылаабынай инженерэ Степан Егоровтыын истиҥ иэйиилээх ырыаларын, Сунтаар улууһун култууратын уонна айылгытын салалтатын салайааччыта Саргылана Дмитриевна кэргэнэ Николай Омуковтыын «Дьиэ кэргэн өрөгөй ырыатын» суһумнуу тыгар фейерверк ортотугар ыллаабыттара сүргэни көтөхтө, көрөөччүнү сөхтөрдө.
Хас биирдии дьиэ кэргэн нүөмэрин толороот, сценаҕа фотосессиялаан истилэр, кинилэргэ Анастасия Махтал суруктары кытта тыыннаах сибэкки бэлэхтээн үөртэ. Түмүгэр киирии билиэтинэн оонньоммут бириистэри оҕолорго Вилюяна Лукина «Дархан» ресторантан сертификаты, улахан дьоҥҥо Альбина, Осип Евсеевтэр «Таптал» афрейм түһүлгэҕэ сертификат сүүйэн үөрүүлэрэ үксээтэ.
СР култууратын үтүөлээх үлэһиттэрэ Мария Василий Спиридоновтар салайааччылаах «Айыллаан» СКК бары үлэһиттэрэ түбүгүрэн тэрээһин үрдүк таһымнаахтык ааста, эҕэрдэлэр махтал тыл эгэлгэтэ этиллэн дьоро киэһэ сыалын ситтэ.
Мария СПИРИДОНОВА