Кулун тутар 15 күнүгэр, Аҕа дойдуну көмүскээччилэр күннэрин чэрчитинэн Сунтаар баһылыгын Анатолий Григорьев бирииһигэр 11-c төгүлүн ыытыллар «Боотурдар оонньуулара — 2024» «Тёщин язык» сынньалаҥ киинигэр буолан ааста.
Күрэхтэһиигэ Сунтаар улууһун 9 нэһилиэктэриттэн хамаандалар — Сунтаар, Аллыҥа, Күүкэй, Кэмпэндээйи, Хадан, Куокуну, Илимниир, Күндэйэ, Тэҥкэ нэһилиэктэриттэн кэлэн кытыннылар. Тэҥкэ нэһилиэгэ боотурдар ооньууларыгар быйыл бастакытын кытынна.
Бу сылга «Боотурдар оонньууларыгар» 7 араас көрүҥ киирдэ: эстафета, хомуур хапсаҕай, «ыараханы көтөҕүү», «аһас дьон күрэҕэ», «өһөс торбос», хомуур мас тардыһыы уонна канат тардыһыы. Ону сэргэ сахалыы элбэх көрүҥҥэ муҥутуур күрэхтэһии » МР-155 саа сүрүн бириистээх, онно араас хамаандалартан баҕалаах дьон кытынна.
«Сахалыы элбэх көрүҥҥэ муҥутуур күрэхтэһии» кыайыылааҕынан Cунтаар нэһилиэгиттэн Алексей Михайлов ааттанна уонна сүрүн бирииһи — МР-155 сааны ылар чиэстэнэн үөрүүтэ үрдээтэ.
Күннээн ыытыллыбыт күрэхтэн кыттыбыт эрэ, көрбүт эрэ бары астынна, Саха сиэринэн кыттааччылар бары илии тутуурдаах бардылар.
Дмитрий ЫМЫЧАНОВ