Бэс ыйын 25 күнүгэр история, биология уонна английскай тыл предметтэригэр БКЭ-ни туттарыы сүрүн болдьоҕун түмүктэрэ билиннэ.
Быйылгы БКЭ-ни туттарыы сүрүн болдьоҕун түмүгүн, улуус үрдүнэн ылар буоллаха, математика профильнай таһымыгар, физика, биология, история, обществознание уонна география предметтэригэр орто баал көрдөрүүтэ үрдээбитэ бэлиэтэнэр диэн улуус үөрэҕириитин управлениетын уопсай үөрэх салаата иһитиннэрэр.
Бу үөрэх дьылыгар математика ппрофильнай таһымыгар 6 оҕо 80 баалтан үрдүк түмүгү көрдөрдүлэр (балартан 2 үөрэнээччи 90 баллы ылла). Оттон маннык үрдүк көрдөрүүнү историяҕа, литератураҕа, обществознениеҕа уонна нуучча тылыгар биирдии үөрэнээччи ылла. Мантан нуучча тылын биир үөрэнээччи 91 балга туттарда.
Оскуолаларынан эксээмэни туттарыы таһымын ылан көрөр буоллахха, үчүгэй түмүктэри Сунтаар лиссиэйин, Бордоҥ орто оскуолатын, Бүлүүчээн лиссиэйин, Сунтаар 1-кы №-дээх орто оскуолатын выпускниктара көрдөрдүлэр.
Оттон саппаас күннэргэ эксээмэни туттарбыттар түмүктэрэ бу күннэргэ биллиэхтээх.
2024 с. ыам ыйын 5 күнүгэр судаарыстыбаннай түмүктүүр аттестация (ГИА) бэрээдэгэр киирбит көннөрүүнэн, оскуоланы бүтэрээччи түмүгү тупсарарга эксээмэни хаттаан туттарар кыахтаах. Чопчулаан эттэххэ, быйыл туттарбыт эксээмэннэриттэн биир эрэ үөрэх предметин хаттаан туттарыан сөп. Маны таһынан математиканы хаттаан туттарааччы эксээмэнин таһымын (профильнай, базовай) эрдэ туттарбытыттан уларытыан сөп. Эксээмэни хаттаан туттарыыга сайабылыанньаны тутуу бүгүн, бэс ыйын 26 күнүттэн, саҕаланна.
Марфа ИВАНОВА