Сунтаар улууһун дьаһалтата ааспыт сыл сэтинньитигэр биллэрбит «Норуот бүддьүөтэ» куоҥкуруһугар Дьаархан нэһилиэгин «Алгыс» түөлбэ байыаннай дьайыы кыттыылааҕа Андрей ийэлээх аҕата Галина Хлебова, Николай Тимофеев олорор дьиэлэрин тупсарыы бырайыагын киллэрбитэ. Түөлбэ салайааччыта Айна Николаева бырайыагы улуус хамыыһыйатын иннигэр көмүскээн 100 т.солк. ылары ситиспитэ. Бырайыак сметатыгар эргэрбит мас сарайын уонна уот ситимин уларытыы үлэтэ киирбитэ.
Манна даҕатан эттэххэ, Дьаархантан 3 бырайыак хамыыһыйа көрүүтүгэр киирбитэ.
Сарай уларытыытыгар сөптөөх тутуу матырыйаалынан олохтоох урбаанньыттар Александр Степанов, Виктор Степанов, Геннадий Иванов, Владимир Иванов хааччыйдылар. Инньэ гынан, от ыйын 2 күнүгэр тутуу матырыйаала барыта кэлэн, олохтоох дьаһалта, түөлбэ эр дьоно уонна баҕа өттүнэн кэлбит ОДьХК, уһуйаан, култуура дьиэтин үлэһиттэрэ түргэн үлүгэрдик өрөмүөн үлэтин үмүрүттүлэр. Үлэни тэрийээччи түөлбэ, олохтоох дьаһалта бэйлээрин баҕа өттүлэринэн улахан көмөнү оҥорбут урбаанньыттарга махтаналлар.
Байыас төрүппүттэрэ улуус, олохтоох дьаһалталартан өйөбүл мэлдьи баарын тоһоҕолоон бэлиэтииллэр. Бу иннинэ, саас, олохтоох дьаһалта үлэһиттэрэ оттук мастарын бэлэмнээн биэрбиттэрэ. Галина Егоровна, Николай Петрович үтүө сүрэхтээх, аһыныгас санаалаах биир дойдулаахтарыгар истиҥ махталларын тириэрдэллэр.
Яина ВЛАСЬЕВА