Ол курдук, Сунтаартан биир ыалтан икки кыыс – Стелла, Мария Васильевалар ааспыт сылларга «Азия оҕолоро» норуоттар икки ардыларынааҕы спортивнай оонньууларыгар тхэквондоҕа ситиһиилээхтик кыттан тураллар. Өссө бу кыргыттартан Стелла икки оонньууга кыттыбыта. Ол курдук, бастаан 2004 сыллаахха буолбут «Азия оҕолоро» III спортивнай оонньууга успуорт бу көрүҥэр III миэстэни ылбыта. Кыыс оонньуулар иннилэригэр өрөспүүбүкэтээҕи сүүмэрдиир киирсиилэргэ бастакы миэстэни ылан, Саха сирин хамаандатыгар киирбитэ. Оттон 2008 сыллаахха Стелла эмиэ успуорт бу көрүҥэр Саха сирин хамаандатыгар киирэр. Бу сырыыга Стелла үчүгэй көрдөрүүлэрдээх киирсэн иһэн, бүтэһиккэ Корея спортсменкатын кытары киирсиитигэр кыһыылаахтык кыайтаран турар. Ол эрээри, успуорт бу көрүҥүн сэҥээрээччилэр этэллэринэн кыргыттар тэҥ-тэҥҥэ киирсибиттэр. Төһө да бириистээх миэстэни ылбатар Стелла Васильева IV «Азия оҕолоро» спортивнай онньууларга чаҕылхай киирсиилэри көрдөрбүтэ. Бу туһунан «Сунтаар сонуннарыгар» суруйан турардаахпыт. Онон Стелла «Азия оҕолоро» спортивнай оонньууларга иккитэ кыттыбыта. Бу сэдэх көстүү буолуохтаах.
Стелла Васильева
Стелла бииргэ төрөөбүт балта Маша эмиэ тхэквондонан утумнаахтык дьарыктанан, өрөспүүбүлүкэҕэ да, дойду таһымнаах да күрэхтэһиилэргэ ситиһиилээхтик кыттар. Эдьиийин кэнниттэн түөрт сыл буолан баран, 2012 сыллаахха, «Азия оҕолоро» V спортивнай оонньууга Мария кыттар чиэскэ тиксэр. Кини бу күрэхтэһиигэ эмиэ үһүс бочуоттаах миэстэни ылан, эдьиийин көрдөрүүтүн чиҥэтэн биэрэр.
Мария Васильева
Бу курдук, биир ийэттэн, аҕаттан төрөөбүт эдьиийдии-балыстыы кыргыттар успуорт историятыгар биир умнуллубат түгэни хаалларбыт спортсменнарбыт буолаллар.
Аны туран, аны кыргыттар ийэлэрэ Эмма Васильевна бииргэ төрөөбүт быраатын кыыһа «Азия оҕолоро» спортивнай оонньууларга боксаҕа кыттан эмиэ үһүс миэстэни ылан турардаах. Ити 2016 сыллаахха. Хаан-уруу балтылара эмиэ Азия оҕолорун күрэхтэһиитигэр тхэквондоҕа эмиэ үһүс миэстэни ылан турардааҕын туһунан, Стеллалаах Мария ийэлэрэ киэн тутта кэпсиир. Онон бу биир аймахтан түөрт оҕо «Азия оҕолоро» спортивнай оонньууларга ситиһиилээхтик кыттан тураллар.
Эмма Васильевнаттан кыргыттар билигин тугунан дьарыктаналларын сурастым. Стелла Олимпийскай эрэл училищетын үөрэнэн бүтэрэн баран, 4-5 сыл тириэньэринэн үлэлээбитэ. Билигин кыыс Екатеринбурга олорор, үлэлиир. Мария Дьокуускай куорат олохтооҕо. Аэропортка үлэлиир.
Кыргыттар РФ успуордун маастарыгар кандидаттар, тхэквондоҕа 1 ДАН чернай поястаахтар.
Яина ВЛАСЬЕВА