Л.А. Попов аатынан Сунтаардааҕы киин бибилэтиэкэ «Үһүс көлүөнэ оскуолата» диэн бырайыагы үлэлэтэр. Манна аҕам саастаах дьоҥҥо араас тиэмэлэргэ сүбэ-ама, сырдатыы дьарыктарын ыыталлар. Дьарыкка кэлбит дьон элбэх туһалааҕы билэллэр, күннээҕи олоххо көдьүүстээҕи туһана үөрэнэллэр, бэйэ-бэйэлэрин кытта алтыһан кэмнэрин сэргэхтик атаараллар.
Ол курдук, бүгүн, олунньу 2 күнүгэр, аҕам саастаах дьоҥҥо куйаар ситимин сыһыарыыларын билиһиннэрии, хайдах туһанарга үөрэтии күнэ буолла.
«Манна Сунтаардааҕы киин балыыһа Колл-центр исписэлиистэрэ Мария Николаевна Алексеева уонна Эльвира Владимировна Иванова кырдьаҕастары «К врачу» анал сыһыарыы, Госуслуги портал көмөтүнэн тустаах бырааска хайдах суруттарыахха сөбүн үөрэттилэр», — диэн Сунтаардааҕы киин балыыһа медпрофилактика кэбиниэтин сиэстэрэтэ Ксения Иванова иһитиннэрэр.
«Сунтаар сонуннара» хаһыат.
Хаартыскалар Сунтаардааҕы киин балыыһа Тг-каналыттан