Бу ааспыт өрөбүлгэ улуус киин балыыһатын үлэһиттэрэ бэс ыйын 16 күнүгэр бэлиэтэнэр идэлээх бырааһынньыктарын чэрчитинэн, айылҕаҕа тахсан сынньанан киирдилэр. Тэрээһин буоларын курдук олус бэркэ барда, араас күрэхтэһиилэр, куоҥкурустар тиһигин быспакка ыытылыннылар.
Бу күн үлэлэригэр бэриниилээх, таһаарыылаах үлэһиттэр Арассыыйа, өрөспүүбүлүкэ, улуус, нэһилиэк, тэрилтэ таһымнаах наҕараадалары туттулар.
Холобур, улуус киин балыыһатын реанимация уонна интенсивнэй терапия лаборант биэлсэрэ Ангелина Иванова, хирургия отделениетын операционнай сиэстэрэтэ Июлия Соломонова «РФ Доруобуйа харыстабылын туйгуна» бэлиэнэн наҕараадаланнылар. Реанимация уонна интенсивнэй терапия лаборант биэлсэрэ Екатерина Ощепкова, Тойбохой балыыһатын медицинскэй сиэстэрэтэ Галина Григорьева РФ Доруобуйа харыстабылын министиэристибэтин Бочуотунай грамотатынан бэлиэтэннилэр.
Дьон доруобуйатын туһугар билиилэрин-көрүүлэрин ууран үлэлиир, өр сыллаах үлэлэрэ сыаналанан стоматологическай отделение сиэстэрэтэ Мария Алексеева, оҕо поликлиникатын сиэстэрэтэ Майя Михайлова, оҕо сытан эмтэнэр балыыһатын сиэстэрэтэ Светлана Яковлева СӨ доруобуйатын харыстабылын туйгуннара буоллулар. Мантан да атын наҕараадалар үгүс үлэһиккэ туттарылыннылар.
Улуустааҕы киин балыыһа ааспыт өттүгэр доруобуйа харыстабылыгар үтүө суобастаахтык үлэлээбит, дьон туһа диэн олохторун анаабыт быраастары үйэтитэр сыаллаах, кинилэр ааттарынан граннары туттардылар. Ол курдук, СӨ үтүөлээх бырааһа, Үлэ Кыһыл Знамята уордьан кавалера Карл Кузнецов аатынан граны «Суһал көмө» старшай биэлсэрэ Степан Николаев тутта. Оттон суһал көмө биригээдэтин медицинскэй сиэстэрэтэ Мария Васильева РСФСР үтүөлээх бырааһа, ССРС доруобуйатын харыстабылын туйгуна Екатерина Яковлева аатынан грант хаһаайката буолла. Участковай сиэстэрэ Юлия Осипова СӨ үтүөлээх бырааһа, РФ доруобуйатын харыстабылын туйгуна Елена Кузнецова аатынан грант тутта.
Яина ВЛАСЬЕВА