Бастыҥ үөрэнээччилэр Анатолий Григорьевы кытта көрсүстүлэр

Бүгүн, улуус дьаһалтатын мунньахтыыр саалатыгар аҕа баһылык Анатолий Григорьев улуус бастыҥ алын сүһүөх оскуолаларын үөрэнээччилэрин кытары көрүстэ. Көрсүһүүгэ 20 үөрэх туйгуннара, култуура уонна успуорт ситиһиилээх оҕолоро, НПК кыайыылаахтара сылдьан улуус баһылыгын кытта атах тэпсэн олорон кыайыыларын, улуус историятын, сайдар кэскилин туһунан кэпсэттилэр. Сунтаар улууһун баһылыга Анатолий Григорьев:

«Кырачаан үөрэнээччилэри кытта көрсүһүүлэри тэрийэрбит үтүө үгэскэ кубулуйда. Сунтаар инники кэскилэ эһиги буолаҕыт. Онон үөрэхтээх, киэҥ билиилээх буоларгытыгар баҕарабын!»- диэтэ. Ол курдук, көрсүһүүгэ үөрэх туйгуна, «Мин төрүччүм» НПК, аан дойдутааҕы үҥкүү, фольклор күрэһин кыайыылааҕа, саахымат күрэҕин призера В.Г.Павлов аатынан Сунтаар алын сүһүөх оскуолатын 4 кылааһын үөрэнээччитэ Лилия Стручкова, көҥүл тустууга оҕолорго Аан дойду күрэхтэһиитин, өрөспүүбүлүкэтээҕи НПК кыайыылааҕа, успуорт эйгэтигэр элбэх ситиһиилээх Арылхан Дьяконов курдук элбэх ситиһиилээх оҕолор кыттыыны ыллылар.

Анатолий Григорьев оҕолор дойдуларын, төрөөбүт сирдэрин туһунан билиилэрин хайҕаата. Көрсүһүүгэ кэлбит оҕолор баһылыктан араас ыйытыктары ыйытан соһуттулар.

Ол курдук, улуус баһылыга оҕо сылдьан тустуу куруһуогар сөбүлээн дьарыктанарын, бастакы кылаастан оскуоланы бүтэриэр диэри биир да үһэ суох үөрэммитин, икки үрдүк үөрэхтээҕин онтон Москва куоракка салайар академияны бүтэрбитин туһунан биллибит. Онтон улууһу салайарга саамай сүрүнэ чиэһинэй буолуу уонна туруоруммут сыалгын ситиһэр хаачыстыба ирдэнэрин оҕолор сэргии иһиттилэр.  Ону тэҥэ, оҕолор киэҥ далааһыннаах ыйытыктары эмиэ биэрдилэр. Бүлүү өрүс муостатын тутуутун, улууска туризм сайдыытын чуолкайдастылар.

Түмүккэ, оҕолор баһылыктан бэлэх туттулар. Ону тэҥэ, сорох оҕолор бэйэлэрэ оҥорбут сэмэй бэлэхтэрин туттардылар.

Салгыы оҕолор үөрүү-көтүү аргыстаах  «Тещин язык» сынньанар кииҥҥэ оонньуу айаннаатылар.

Мира АФАНАСЬЕВА    

 

Читайте дальше