Оҕону бастакы кылааска ылыы 458 №-дээх Үөрэҕирии министиэрстибэтин бирикээһинэн уонна 2012 с. “Российскай Федерацияҕа үөрэхтээһин” 273 №-дээх федеральнай сокуонунан ыытыллар.
2024 сылга туох уларыйыы киирдэ?
2023 сылтан улахан уларыйыы суох. Ол эрэн, байыаннай дьайыыга өлбүт эбэтэр бааһырбыт төрөппүттэрдээх оҕолор уочарата суох бастакы кылааска киирэр быраабынан туһаналлар.
Төрөппүттэр сайабылыанньаны хаһан суруйалларый?
Бастакы кылааска суруйтарыы күнүн-дьылын 2023 сылтан оройуоннар (муниципалитеттар) бэйэлэрэ туруорар буолбуттара. Сунтаарга муус устар 1 күнүттэн оскуолалар сайабылыанньаны тутуохтара. Кулун тутар 18 күнүттэн “Госуслуги” сайтка сайабылыанньа черновига арыллыаҕа. Онтон муус устар 1 күнүгэр эрдэ толорбут черновиккытын ыытыаххытын сөп. Маннык дьаһаныы сайт харбакка үлэлииригэр тоҕоостоох. Оҕолору ылыы икки түһүмэҕинэн барыаҕа. Бастакы түһүмэх муус устар 1 күнүттэн бэс ыйын 30 күнүгэр диэри ыытыллыаҕа. Бу түһүмэххэ оскуолаҕа сыһыарыллыбыт оройуоҥҥа олорор оҕолору, чэпчэтиинэн туһанааччылары, ону тэҥэ уочарата суох бастакы киирээччилэртэн ылыахтара. Онтон балаҕан ый 5 күнүгэр диэри оскуолаҕа миэстэ баарыттан сайабылыанньаны тутуохтара.
Оҕону маҥнайгы кылааска биэрэргэ ким ураты быраабы туһанарый?
Уочарата суох быһа киирэр быраабынан силиэстийэлиир кэмитиэт, судьуйалар уонна прокуратура үлэһиттэрин оҕолоро туһаналлар. Ону тэҥэ, байыаннай дьайыы кыттыылаахтарын оҕолоро киирдилэр.
Полиция, ФСИН, МЧС, таможня, байыаннайдар үлэһиттэрин оҕолоро уочаракка маҥнайгынан киирэллэр. Оттон биир оскуолаҕа үөрэнэр убайдаах, эдьийдээх буоллаҕына, эмиэ уочаракка инники хапсар.
Сайабылыанньаны толорорго ханнык докумуон ирдэнэрий?
– төрөппүт пааспара
– оҕо төрөөбүтүн туһунан туоһулуур докумуон
– оҕо олорор сирин туоһулуур докумуон
Оскуола атын докумуоннары эбии ирдэһиэн сөп. Онон оҕоҕутугар сыһыаннаах докумуону чугас тутаргытын сүбэлиибит.
“Госуслуга”сайт нөҥүө сайабылыанньаны хайдах биэрэбит?
- “Госуслуга” сайтыгар поисковикка “Запись 1 класс” диэн суруйабыт.
- “Подать заявление” диэни талабыт.
- Логин уонна пароль көмөтүнэн авторизацияны ааһабыт.
- Сайабылыанньа электроннай форматын толоробут.
- Сайабылыанньаҕын тустаах оскуола туппутун туоһулуур эппиэти күүт (тус кэбиниэккэр көрүөххүн сөп).
- Сайабылыанньаҕын туппуттарын туһунан иһитиннэриитэ тут.
Оҕо киирбитэ-суоҕа хаһан биллэр?
От ыйын 3 күнүгэр диэри төрөппүттэргэ оҕону оскуолаҕа ылбыттарын туһунан иһитиннэрии кэлиэхтээх. Ол эрэн балаҕан ыйын 5 күнүгэр диэри оскуола сайабылыанньаны тутар.
Буоларын курдук, Сунтаарга В.Павлов аатынан Сунтаардааҕы алын сүһүөх оскуолата бастакы кылааска элбэх оҕону ыларга бэлэм. Ол курдук, 6 бастакы кылаас арыллыаҕа. Учууталларынан Кривошапкина С.Ф., Андреева Л.Б., Васильева Н.В., Васильева Н.В., Семенова Т.Д., Кондратьева С.Н. буолуохтара.
Сунтаардааҕы 1№-дээх оскуолаҕа 1 кылаас арыллар. 30 оҕону ылыахтара. Учууталынан Иванова Р.А. буолуоҕа.
Сунтаардааҕы 2№-дээх оскуолаҕа 1 кылаас арыллыаҕа, Калачикова К.В. бастакы кылааска оҕолору тутуоҕа.
Сунтаардааҕы 3№-дээх оскуолаҕа эмиэ 1 кылаас учууталынан Кириллина Н.А. буолуоҕа.
Аадырыһынан ханнык оскуолаҕа сыһыарылларгытын сиһилии бу QR-код көмөтүнэн көр
Мира АФАНАСЬЕВА