«Тыа сирин биир кэлим сайыннарыы» судаарыстыбаннай бырагыраама чэрчитинэн, улууспут киинигэр бассейн тутуута сөргүтүллэн үлэ бара турарын көрө-билэ сылдьабыт.
Билигин бу эбийиэк ис өттүгэр 9 киһи үлэлии сылдьар. Тутуу матырыйаала бу күннэргэ баржанан кэллэ да, үлэһиттэр толору састаабынан тутууну салгыы ыытыахтара.
Тутууну Ньургун Саввин генеральнай дириэктэрдээх «Тутуу Саха» ХЭТ ыытар.
Бары билэрбит курдук, бассейны тутуу араас төрүөтүнэн тардыллан, уһаан турар. Оттон саҕаламмыт үлэ, тутуу хайаан да түмүктэниэхтээх диэн улуус дьаһалтата сүүрэн-көтөн, саҥа тутуу тэрилтэтин булан, бу үлэ салгыы баран эрэриттэн үөрэбит. Улууспут баһылыга Анатолий Григорьев Дьокуускай куоракка дьыалабыай сырыыларыгар тутууну салгыы ыытыахтаах хампаанньа генеральнай дириэктэрэ Ньургун Саввины кытары үгүс боппуруоһу быһаарсыбыттара.
Бу ааспыт өрөбүллэргэ бырайыактааччылар бассейны салгыы тутууга үлэлэһэн бардылар.
Онон бу тутуу боппуруоһа быһаарыллан, сотору улууспутугар бассейн баар буолуоҕа диэн эрэнэбит.
Манна даҕатан эттэххэ, оҕо спортивнай оскуолатын дириэктэрэ Владимир Данилов тутууну ыытыахтаах инженердэри кытары Жатайга үлэлии турар бассейҥҥа сырыттылар, бассейн дириэктэрин кытары көрүстүлэр. Бу туһунан улуус дьаһалтатын пресс-сулууспата бэйэтин @suntaar_ulus телеграм каналыгар суруйбута.
Яина ВЛАСЬЕВА