Байыаннай дьайыы кыттыылаахтарыгар оскуола үөрэнээччилэрэ истиҥ суруктары уонна харысхал бэлиэлэри оҥорон ыыталлара үгүс. Оттон Күндэйэ Б.Н.Егоров аатынан агро хайысхалаах орто оскуолатын 8-с кылааһын үөрэнээччилэрэ соботтон кэнсиэрбэ астаан ыыттылар.
Оскуола производственнай үөрэхтээһинин маастара Юлия Дьяконова, кылаас салайааччыта Виктория Егорова, научнай салайааччы Наталья Максимова буолан «Соботтон кэнсиэрбэ» диэн бырайыак толкуйдаабыттар. Маҥнай нэһилиэк олохтоох дьонуттан собо тутан үөрэнээччилэр төрөппүттэринээн буолан ыраастаабыттар. Ол кэннэ маринуйдааннар анал бакыаттарга соболорун уган, «Тускул» кэпэрэтиип анал оһоҕор илдьэн буһарбыттар. Барыта 180 киилэттэн 188 хаа кэнсиэрбэ бэлэм буолбут. Бу ураты, сонун бырайыак бары өттүнэн туһалаах буолан биэрдэ. Ол курдук, оҕолор собону ыраастааһынтан саҕалаан хайдах астанарын билистилэр. Аһылыгы өр кэмҥэ харайыы кэнсиэрбэни оҥоруу ньыматын үөрэттилэр.
Түмүккэ бэлэмнээбит астарын Сунтаарга «Харысхал» уопсастыбаннай түмсүүгэ саллааттарга ыытарга үтүө баҕа санааларын этэн туран туттардылар. Маны сэргэ оскуола кэлэктиибэ чэй уонна кэпэрэтиип бэлэмнээбит эт кэнсиэрбэлэрин туттардылар.
Алена ИВАНОВА