Анал байыаннай дьайыыга сылдьар байыастарбытыгар улуус олохтоохторо кыратыттан кырдьаҕаһыгар тиийэ ыраас, сырдык санааларын иҥэрэн, үтүө-мааны алгыс тылларын анаан туран араас өрүттээх материальнай көмөнү быыстала суох ыыта, оҥоро олороллор.
Быйыл дойдубутугар Аҕа дойдуну, оттон биһиги өрөспүүбүлүкэбитигэр Ийэ дойдуну көмүскээччилэр сыллара биллэриллэн, дойдуга тапталы күүһүрдүү, дойдуну харыстыырга итии-үөрэтии үлэлэрэ уһуйаан иитиллээччилэриттэн саҕалаан үөрэх кыһаларыгар тиһиктээхтик бараллар. Биһиги биир дойдулаахтарбыт СВО-ҕа баран, Аҕа дойду көмүскэлигэр хорсун быһыылары күннэтэ оҥороллор. Манна биһиги кинилэргэ күүстээх, эрэллээх тыыл буолуохтаахпытын оскуола үөрэнээччилэрэ дьэҥкэтик өйдүүллэр. Онон байыастарга анаан «Саллаакка сурук», «Эһигинниин – бииргэбит», «Илиибит сылааһа» уо.д.а. аахсыйаларга көхтөөхтүк кытталлар.
Холобур, бу аҕыйах хонуктааҕыта Сунтаар 3 №-дээх оскуолатын 11-с кылааһын үөрэнээччитэ Карина Павлова көҕүлээһининэн, оскуола үөрэнээччилэрэ, учууталлар уонна төрөппүттэр «Байыаска — талисман» аахсыйаҕа кыттыһан, бэйэлэрин илиилэрин сүрдээх үчүгэй ымыылары (талисманнары) оҥорбуттарын «Харысхал» түмсүүгэ аҕалан туттардылар. Бастаан Кыайыы 80 сылынан диэн 80 устууканы оҥорорго санаммыттара, оскуола үрдүнэн бары оҥорбут ымыылара 100-чэ буолбут.
Оҕолор, учууталлар, төрөппүттэр оҥорбут ымыылара байыастары харыстыы, арчылыы сырыттын.
Яина ВЛАСЬЕВА