Сунтаар улууһуттан анал байыаннай дьайыыга сылдьар биир дойдулаахтарбыт сулууспаларын чэпчэтэр сыалтан уонна биир дойдулаахтарбыт хайдах сулууспалыы сылдьалларын көрө-истэ, көмөлөһө улууспут баһылыга Анатолий Григорьев салайааччылаах делегация барбыта. Кинилэр төһө кыалларынан хас биирдии уолу көрсөр былааннаахтар.
Ол курдук, баһылыкпыт Анатолий Григорьев, Сунтаар нэһилиэгин баһылыга Эдуард Филиппов уонна успуорт отделын салайааччыта Семен Павлов Ростовка тиийэн үлэлии сылдьаллар.
Кинилэр бааһырыы ылан саллааттар эмтэниини ааһар госпиталларыгар тиийэн кэһиилэри туттардылар. Манна билигин икки уол баар.
Уолаттар төрөөбүт дойдуларыттан кэлбит баһыыкканы тутан үөрдүбүт, сэргэхсийбит дииллэр. Бу туһунан Сунтаар улууһун дьаһалтатын пресс сулууспата суруйар — @suntaar_ulus
«Сунтаар сонуннара» хаһыат