«Предупреди пожар – установи АДПИ» диэн аахсыйа 2018 сылтан ыытыллар. Бу аахсыйа көмөтүнэн элбэх оҕолоох ыалларга, бэтэрээннэргэ, инбэлииттэргэ баһаар буолбутун тута биллэрэр (АДПИ) тэриллэри туруоруу күүскэ барар. Бу тэрил көмөтө олус улахан. Холобур, хас да улууска бу тэрил эрдэ тыаһаабытын түмүгэр, баһаартан элбэх киһи быыһаммыта. Онон тустаах тэрили туруортарар ордук.
Биһиги улууспутугар билиҥҥи туругунан аахсыйа көмөтүнэн баһаары биллэрэр тэрил (АДПИ) хас ыалга баар буолла диэн улуустааҕы баһаарынай сулууспа үлэһитэ Ольга Иванова-Алексееваттан туоһуластым. Онуоха кини маннык сырдатта:
— Сунтаар улууһун үрдүнэн 2248 устуука АДПИ туруоруллубута. Бу сылга 428 устуука эбии туруораллара былаан баар. Нэһилиэктэр бу хамсааһыҥҥа көхтөөхтүк кытталларын бэлиэтиэххэ наада. Холобур, Тэҥкэ уонна Туойдаах нэһилиэктэрэ 100% ылан ыалларынан иилэн биэрбиттэрэ хайҕабыллаах.
Биһиги баһаары утары үлэҕэ оскуолаларынан, ыалынан сылдьан бу тэрил туһунан элбэхтик билиһиннэрэбит, туох көдьүүстээҕин өссө төгүл иһитиннэрэбит.
Бу сыл бүтүөр диэри «Предупреди пожар — установи АДПИ» социальнай аахсыйа салҕанан бара турар. Онон тэрилтэ салайааччыларын, үлэһиттэрин бу аахсыйаҕа кыттыаҕыҥ диэн ыҥырабыт.
Ааптар: Яина ВЛАСЬЕВА