Биир дойдулаахпыт талба талааннаах Туйаара Никифорова баатанан эҥин дьикти оҥоһуктары оҥорорун сырдатан турардаахпыт. Оттон бүгүн Туйаара баатанан харыйа оонньуурун оҥорор маастар-кылааһын үллэстэр.
1. Биһиэхэ ирдэнэр: баата, боробулуоха, салгыҥҥа хатар туой, маҥан сап, икки чайнай ньуоска крахмал, ыстакаан кыра аҥара оргуйбут итии уу, акриловай кырааска, киистэ, туойунан үлэлииргэ аналлаах тэриллэр.
2. Бастаан туойунан сирэй оҥоробут, силиконовай киэби (молду) эмиэ туһаныахха сөп. Хаппытын кэннэ хараҕын, хааһын, уоһун, иэдэһин уруһуйдуубут.
3. Боробулуоханан оҕо быһыытын оҥоробут. Ону баатанан эрийэбит, ыһыллыбатын курдук сабынан кэлгийэбит. Оҕо быһыытын-таһаатын таһаарабыт. Онтон сирэйин килиэйдиибит.
4. Клейстер оҥоробут: крахмалы кыра тымныы ууга кутан булкуйабыт. Үрдүгэр оргуйа сылдьар ууну кутан үчүгэйдик булкуйабыт.
5. Таҥаһын оҥорорго баатаны чараас гына ыла-ыла боробулуоханан оҥоһуллубут фигураҕа эрийэбит, клейстерынан сыбыыбыт. Оннук гынан сон, ыстаан, бэргэһэ, үтүлүк, хаатыҥка оҥоробут.
6. Хатара уурабыт, хаппытын кэннэ акриловай кыраасканан таҥаһын кырааскалыыбыт.
7. Бу сырыыга оҕобут хоккей оонньуурун сөбүлүүр уол. Ол иһин киниэхэ клюшканы халыҥ хортуонтан оҥорон туттардым. Ол оннугар бэлэх, апельсин, бэрэски уо.д.а. илиитигэр туттарыаха сөп.
8. Оонньуурбут бэлэм буолбутун кэннэ биэтилэтигэр быа кэтэрдэн харыйабытыгар иилэн кэбиһэбит.
Алена ИВАНОВА