Сунтаардааҕы А.И Иванов аатынан олимпийскай эрэллэри бэлэмниир успуорт оскуолатын иитиллээччилэриттэн быйыл 2024 сылга ыытыллар “Азия оҕолоро” норуоттар икки ардыларынааҕы спортивнай оонньууларга икки оҕо кыттыаҕа, оттон түөрт спортсмен кыттара күрэхтэһиилэр түмүктэринэн биллиэ.
Ол курдук, пневматическай бэстилиэтинэн буулдьанан ытыыга Ераскумова Виктория Саха сирин хамаандатыгар киирбитэ, тириэньэрэ — Александр Николаев. Билигин Вика Ижевск куоракка Арассыыйаҕа бастыыр иһин күрэхтэһиигэ сылдьар.
Ох саанан ытыыга Попов Амир кыттыыны ылыа, тириэньэрэ — Ньургуйаана Петрова.
Көҥүл тустууга Саха сирин хамаандатыгар киирэргэ түөрт хандьыдаат баар — Николаев Эрхаан, Павлов Леонид, Потапов Александр уонна Готовцев Арчын. Кинилэр кытталлара Дмитрий Данилов бирииһигэр Саха сиригэр бастыыр иһин күрэхтэһии түмүгүнэн биллиэҕэ.
Санатан этэр буоллахха, “Азия оҕолоро” норуоттар ардыларынааҕы VIII спортивнай оонньуулар бэс ыйын 25 күнүттэн от ыйын 7 күнүгэр Дьокуускай куоракка ыытыллар.
Дмитрий ЫМЫЧАНОВ