Алтынньы саҥатыгар Сунтаардааҕы технологическай колледж Алмазэргиэнбанк» акционернай уопсастыба ыытар корпоративнай волонтердар бырайыактарын куоҥкуруһугар кыттан кыайыыны ситистэ. «Дьиэ кэргэн бүдьүөтэ» диэн бырайыагы Сунтаардааҕы «Алмазэргиэнбанк» олоххо киллэриигэ, корпоративнай килийиэннэри көрүү бөлөҕүн салайааччыта А.А. Кондратьева, дириэктэри үөрэх чааһыгар солбуйааччы М.М. Попова, үп-харчы үөрэҕэр уонна экономика сүрүн төрүттэригэр уһуйааччы Д.В. Трофимова үлэлэстилэр.
Бу бырайыак иһинэн алтынньы 22 күнүгэр колледж устудьуоннарыгар Сунтаардааҕы социальнай пуонда салаатын үлэһиттэрэ кэлэн, араас сүбэлэри биэрдилэр. Сүрүннүүр исписэлиистэр П.М. Федорова, А.Г. Мармузова устудьуоннарга социальнай пуонда үлэтин, биэнсийэ уонна араас төлөбүрдэр тустарынан кэпсээтилэр. А.А. Кондратьева “Алмазэргиэнбанк” бырайыактарын уонна волонтерскай үлэ туһунан сырдатта.
Көрсүһүү олус сэргэхтик ааста, элбэх ыйытыктар бэрилиннилэр. Үп-харчы сатабылын туһунан бырайыакка бииргэ үлэлэһии салҕанар.
Сунтаардааҕы технологическай колледж пресс-сулууспата