Сунтаардааҕы 2№-дээх орто оскуола 2019 сылтан агро хайысхалаах оскуола статуһун сүгэр. Бастаан оскуола оҕуруот аһын үүннэриитинэн дьарыктаммыта. Оҕолор көрөн-истэн, бүөбэйдээн үүннэрбит оҕуруот астарын нэһилиэнньэҕэ хамаҕатык батараллара. Билигин даҕаны бу салааларын сайыннарар соруктаахтар. Оскуола оҕону оҕо сааһыттан үлэҕэ сыһыардахха, үлэ үөрүйэхтэригэр үөрэттэххэ уопсастыбаҕа туһалаах киһи буола улаатар диэн иитэр-үөрэтэр хайысханы тутуһаллар. Билигин оскуола хаһаайыстыбата кэҥээн дьиэ көтөрүн иитэр буолла. Оҕолор сылы эргиччи үөрэхтэрин кэннэ харамайдарын көрөллөр-истэллэр, аһаталлар, үлэ үөрүйэхтэригэр үөрэнэллэр. Ол курдук, оскуола пиэрмэтигэр хаастар, кууруссалар, кустар, кроликтар бааллар. Ону тэҥэ, Бордоҥҥо сылгылары туталлар эбит. Сылыгларын үөргэ диэри элбэтэр баҕа санаалаахтар.
Оҕолор инкубаторга кус, куурусса сымыыттарын уган чоппуускалары, кус оҕолорун таһаараллар. Бу үөрүйэхтэринэн сорох оҕолор чинчийии үлэтин ыытан бырайыак суруйан араас НПК ситиһиилээхтик кытталлар. Хаас оҕотун эмиэ инкубаторга таһааран тураллар. Дьоҕус пиэрмэ сибиэһэй көтөр сымыытынан сылы эргиччи эргинэр. Олохтоох дьон оскуола пиэрмэтиттэн сымыыты хамаҕатык атыылаһаллар. Дьон кус сымыытын атыылаһан бэйэлэрэ кус таһааран ииттинэр буолбуттар. Бу холобурунан оҕолору үлэҕэ эрэ буолбакка атыыга-эргиэҥҥэ, аныгы кэм пиэрмэрин сатабылыгар үөрэтэллэр. Атыыттан киирбит үбүнэн пиэрмэ харамайдарын аһылыктарын таах толуйаллар. Борис Федоров Сунтаардааҕы 2№-дээх орто оскуола маастара: «Дьоҕус пиэрмэбитигэр оҕолор үөрэхтэрин кэннэ үөрүүнү кытта кэлэн харамайдары кытта алтыһаллар. Сайынын көтөрдөрбүтүн оскуола аттынааҕы ууга ыытабыт. Көрүөххэ олус астык буолар. Оҕолор көтөрдөрү үчүгэйдик көрөр буоланнар өлүү-сүтүү аҕыйах, элбииргэ эрэ барабыт».
Оскуолаҕа маннык үлэ көрүҥэ оҕо үлэҕэ сыстан тыа сирин сайыннарар, олох уйгутун тупсарар дьон буола улааталларыгар улахан суолталаах.
Мира АФАНАСЬЕВА
