Ахсынньы 3 күнүгэр РСФСР уонна Саха АССР үтүөлээх учуутала М.Н. Анисимов 130 сааһын бэлиэтээн, кини үтүө аатын үйэтитэр сыаллаах үөрэммит, үлэлээбит Сиэйэ орто оскуолатыгар улуустааҕы «Анисимовскай ааҕыылар» буолан ааста. Хадан, Бордоҥ, Сунтаар, Устье, Күндэйэ, Элгээйи, Күүкэй, Кутана, Түбэй, Түбэй-Дьаархан, Сиэйэ оскуолаларын учууталлара, үөрэнээччилэрэ, уһуйааннарын иитээччилэрэ барыта 83 киьи кэлэн кыттыыны ыллылар. Улуустааҕы тэрээһин Сунтаардааҕы үөрэх салалтатын сүрүннүүр специалиһа Попова М.И. уонна оскуола дириэктэрэ Федоров В.В. иилээн-саҕалаан тэрийиилэринэн үрдүк таһымҥа ааста. «Анисимовскай ааҕыы» 6 секцияннан үлэлээтэ.
1 секцияҕа 12 үөрэнээччи доклад аахтылар, түмүгэр Түбэй орто оскуолатын үөрэнээччитэ Игнатьева Арияна 1 миэстэни ылла, 2 секцияҕа 4 учуутал кыттыыны ылбытыттан 1 миэстэни Күндэйэ оскуолатын физикаҕа учуутала Саввинова А.О ылла, 3 секцияҕа 6 кыттааччыттан 1 миэстэни Күндэйэ оскуолатын учуутала Васильева Л.В. ылла, 4 секцияҕа 10 аһаҕас уруок ыытыллыбытыттан кыайыылааҕынан Сиэйэ орто оскуолатын математикаҕа учуутала Данилова Д.В. буолла, бу секцияҕа мастер кылаас күрэһигэр 1 миэстэни Элгээйи оскуолатын хамаандата кыайыылаах буолллулар.
5 секцияҕа 14 кыттааччыттан Сунтаардааҕы «Ньургуһун» уһуйаан иитээччилэрэ Алексеева Н.А., Федорова Т.С. 1 миэстэ буоллулар, 6 секцияҕа доклад ааҕыытыгар 1 миэстэни ыллылар: Күндэйэ орто оскуолатын учууталларын хамаандата, Сунтаардааҕы «Кыталык» уһуйаан иитээччилэрин хамаандата; мастер кылааска Сиэйэтээҕи «Радуга» уһуйаан иитээччилэрин хамаандата 1 миэстэни ылары ситистэ.
Ыраахтан-чугастан кытта кэлбит бары кыттааччыларга дириҥ махталбытын тиэрдэбит.
Кэлэр өттүгэр М.Н. Анисимов аатынан ааҕыылары региональнай таһымҥа ыытарга баҕа санаалаах түмүктэннэ.
Антонина Иванова- М. Н. Анисимов аатынан Сиэйэ орто оскуолатын завуһа
