Муус устар 9 күнүгэр Сергей Афанасьевич Зверев-Кыыл Уолун сүдү талааныгар сүгүрүйэн, 125 үбүлүөйдээх сылын көрсө «ТОҔУС ОҺУОРДААХ ТҮҺҮЛГЭ» диэн өрөспүүбүлүкэтээҕи норуот уус-уран айымньытын күрэһин үөрүүлээх арыллыыта Дьокуускай куоракка буолла.
Бу тэрээhиҥҥэ норуот дьокутаата Андрей Николаев кытынна. Кини Сунтаар улууhун кэккэ үлэһиттэригэр култуураҕа кылааттарын иhин сис кэмитиэт анал бочуоттаах грамоталарын үөрүүлээх быhыыга-майгыга туттартаата.
Сунтаар улууһугар 2018 сылтан муус устар 9 күнүгэр улуу ырыаһыт, оһуохайдьыт, үҥкүүһүт Сэргэй Сибиэрэп-Кыыл Уолун күнэ бэлиэтэнэр. Бу кини төрөөбүт бэлиэ күнэ буолбатах, аар тайҕа ырыаһыта бастакы улахан хайҕалын – САССР Үрдүкү Сэбиэтин Бочуотунай грамотатын ылбыт күнэ. Бу күн Сунтаарга «Тоҕус оһуордаах түһүлгэ» диэн норуот айымньытын 9 көрүҥэр күрэс ыытыллар буолбута. Кыыл Уола 9 көрүҥҥэ дэгиттэр дьоҕурдаах киһи этэ.
Билиҥҥи өйдөбүлүнэн Сэргэй Сибиэрэп-Кыыл Уола Өксөкүлээх Өлөксөйү, Былатыан Ойуунускайы кытта биир кэрдиискэ турар, үс саханы үөдүтэр, түөрт саханы төлкөлүүр ыйаахтаах, саханы аар-саарга албан аатырдарга үрдүк айыылартан ананан үөскээбит киһи диэн билинэбит. Уонна ол аналын таһыччы толорбутун, биир киһи кыаҕар бэриллибит улуу талаана: норуот ырыаһыта, суруйааччы, бэйиэт, тойуксут, оһуохайдьыт, чабырҕахсыт, мелодия (матыып) айааччы уонна самодеятельнай хампаһыытар, саха үҥкүүтүн айааччы уонна туруорааччы, алгысчыт, бөлүһүөк, саха төрүт тылын-өһүн, култууратын, сиэрин-туомун билээччи уонна тарҕатааччы да буолара итэҕэтиилээхтик туоһулуур.
«Тоҕус оһуордаах түһүлгэ» фольклорнай күрэс сүрүн суолтата – Сэргэй Сибиэрэп-Кыыл Уола хаалларбыт баай култуурунай нэһилиэстибэтин салгыы үөрэтэн, чинчийэн, кини сүдү аатын өссө дуораһытыы, дьоҥҥо-сэргэҕэ, кэнэҕэски ыччакка тиэрдэн саха норуотун төрүт үгэһин үйэлэргэ хаалларыы!
Ил Түмэн пресс-сулууспата