Бэҕэһээ, алтынньы 21 күнүгэр, Сунтаар улууһун биир кэрэ-бэлиэ сиригэр — Наахараҕа баар «Бөрө үүтээнэ» базаҕа, Бүлүүчээн, Куокуну уонна Наахара нэһилиэктэриттэн анал байыаннай дьайыыга сылдьар байыастар ийэлэригэр, кэргэттэригэр аналлаах тэрээһин буолла. Бу көрсүһүүгэ анаан ыҥырыллыбыт психолог Татьяна Егорова мустубут кэрэ аҥаардарга санаа күүрүүтүн устар тренини ыытта. Сунтаардааҕы политехническай лиссиэй бибилэтиэкэрэ Антонина Егорова «Саха абыычайа уонна үгэстэрэ» диэн тиэмэҕэ викториналатта. Салгыы норуот эмчитэ Урсууна Федорова күннээҕи олоххо оҕону иитии төрүт үгэстэри кытта ситимигэр бэрт интэриэһинэй бэсиэдэни ыытта, эмтээх үүнээйилэр тустарынан кэпсээтэ уонна хас биирдии ыалдьыкка туһунан ыраастаныы сиэрин-туомун оҥордо. Эбиэккэ ыалдьыттары кулуһуҥҥа буспут сахалыы ис миининэн күндүлээтилэр. Онтон «Дьулуур» КСК-ҕа Зоя Максимова ролл астааһыныгар маастар-кылааһы ыытта. Киэһэтин тэрээһин кыттыылаахтара оттулла турар оһох сыралҕаныгар итии чэйдээх алтыстылар, гитара доҕуһуолунан ыллаатылар-туойдулар. Тэрийээччилэр бу судургута суох балаһыанньаҕа олорор, оҕолорун, кэргэттэрин анал байыаннай дьайыыга атаарбыт кэрэ аҥаардары өйүүр соруктаах тэрээһини ыыталларыгар өйөөбүт, көмөлөспүт улуус баһылыгын солбуйааччы Николай Александровка, Ыччат бэлиитикэтигэр отдел салайааччыта Трофим Ивановка, нэһилиэктэр баһылыктарыгар уонна тэрээһиҥҥэ сүүрбүт-көппүт дьоҥҥо бука барыларыгар махталларын этэллэр. Бу көрсүһүү ийэ, кэргэн дьону долгуйар, хараастар санааларыттан кыра да кэмҥэ аралдьытан ылбытыгар эрэнэ саныыллар.
«Сунтаар сонуннара» хаһыат.