Бүгүн, сэтинньи 14 күнүгэр, улуус дьаһалтатын аактабай саалатыгар улуустааҕы дьарыктаах буолуу киин көҕүлээһининэн, анал байыаннай дьайыы кыттыылаахтарыгар уонна кинилэр дьиэ кэргэттэригэр үлэ дьаарбаҥката ыытылынна.
«Уолаттарбыт ытык иэстэрин толорон, дойдуларыгар төннөн кэлэн түргэнник, сымнаҕастык, улахан охсуута суох эйэлээх олоххо киирэн үөрэнэллэригэр уопсастыба улахан оруолу ылар. Манна тэрилтэ салайааччылара, уопсастыбаннас сыал-сорук оҥорон, хас биирдии үлэ биэрээччи түмсэн, үлэнэн хааччыйыыбыт сүрүн сорук буолар», – диэн этиитинэн дьарыктаах буолуу киинин салайааччыта Борис Уларов бүгүҥҥү дьаарбаҥканы саҕалаата.
Манна Росгвардия, Сунтаардааҕы технологическай колледж, СХПК «Крестях», «Сунтарцеолит» ХЭТ, итиэннэ улууспут биир биллэр-көстөр, улахан урбаан тэрилтэлэрэ «Татыйыына», «Корона» салайааччылара, бэрэстэбиитэллэрэ кэлэн кыттыыны ыллылар. Үлэни биэрээччи тэрилтэлэр үлэһиттэргэ анаан көмө оҥороллорун иһитиннэрдилэр. Холобура, СХПК «Крестях» салайааччыта Владимир Егоров чэпчэтиилээх бэйэ бородууксуйатынан үлэһиттэри хааччыйарын уонна Сунтаардааҕы технологическай колледж дириэктэрэ Гаврил Михайлов суоппар идэтигэр үөрэниэн баҕалаах анал байыаннай дьайыы кыттыылаахтарыгар уонна кинилэр дьиэ кэргэттэригэр бары категорияҕа 10% чэпчэтии көрүллэрин эттилэр.
Маны тэҥэ, байыастар уонна кинилэр дьиэ кэргэттэрэ мунаахсыйар боппуруостарыгар көмөлөһөр, өйүүр сыаллаах «Аҕа дойду көмүскээччилэрэ» судаарыстыбаннай пуонда, Сунтаардааҕы социальнай көмүскэл управлениета, Сунтаардааҕы пенсионнай пуонда, «Мин биисинэһим» киин, итиэннэ Сунтаардааҕы психологическай көмө киинин үлэһиттэрэ түмсэн, мунаахсыйар боппуруостарга уонна уйулҕа көмөтүгэр наадыйааччыларга тус сыаллаах консультация оҥордулар. Тэрилтэлэргэ ордук ханнык исписэлиистэр тиийбэттэрин эттилэр. Ол курдук, суоппар, суол маастара, атыыһыт, буҕаалтыр, иитээччи, электромонтер о.д.а.
Маннык дьаарбаҥка биһиги улууспутугар үгэс быһыытынан балай эмэ элбэхтэ тэриллэр. Нэһилиэнньэ хас биирдии олохтооҕо үлэлээх буоларыгар төһүү күүс буолар.
Елизавета ТИТОВА