Муус устар 4 күнүгэр Герасимов М.И. аатынан Сунтаардааҕы санаторнай оскуола-интернакка бэрт ураты кун буолла. Ол курдук улуустааҕы алын кылаас оҕолорун КВН хамаандаларын икки ардыгар «Көөчөөн Көрө, Бэрт Бэтиэхэ»күрэс үһүс төгүлүн ыытылынна.
Манна улуус 5 оскуолатыттан КВН хамаандалара кэлэн өрө күүрүүлээхтик кытыннылар.
Күндэйэттэн «Күн Дьоно», Шеяттан «Оҕочоостор», Маар Күөлтэн «ЭСТА», Тойбохойтон «Уу-чукурук», Бордоҥтон «Бордоҥ бэтиэхэлэрэ».
Хамаандалар бары даҕаны бэркэ бэлэмнэнэн, ох курдук оҥостон кэлэн ситиһиилээхтик кытыннылар.
Сынньалаҥ кэмигэр оҕолорго араас көрдөөх оонньуулары «СунАМП» Сунтаар улууһун эдэр педагогтарын Ассоциациятыттан Нь.Я.Назарова , Л.Ю.Семенова ыыттылар, минньигэс астаах остолобуой үлэлээтэ.
Кэлбит ыалдьыттар туус хоһугар эмтээх салгынынан тыыннылар, кислороднай коктейль, фиточай амсайан доруобуйаларын чэбдигиртилэр. Оҕолор тыыннаах муннугу сэргээн көрдүлэр: декоративнай кроликтар, уу чараппаахыта, улитка, хомяктар, соҕуруу дойду чыычааҕа, араас балыктар оҕолор болҕомтолорун тартылар. Хамаандалар 3 сорудаҕы толорон көрдөрдүлэр: «Бэйэни билиһиннэрии» («Дорообо, КВН» диэн тиэмэлээх), «Сааскы көрүдьүөстэр», «Музыкальнай» (тиэмэтэ «Арай биирдэ переманаҕа…»). Дьүүллүүр сүбэ «Кинопародия» сорудаҕы видеонан көрөн дьүүллээтэ. Күрэскэ кыттааччылар көр-нар аргыстаах олус көхтөөхтүк күөн күрэстэстилэр.
Дьүүллүүр сүбэ түбүктээх үлэ кэннэ номинациялары таһаарда:
«Көрдөөх Көөчөөн»- Сунтаар санаторнай оскуолата; «Бэрт Бэтиэхэ» — Бордоҥ оскуолата;
«Мистер Көрдөөх Көкөт» (мистер КВН) — Четвертаков Ярослав, «Мисс Күн Күлүү» (мисс КВН)- Миронова Сардаана
Үһүс үрдэл — Шеяттан «Оҕочоостор» хамаанда. Иккис үрдэл — Маар Күөлтэн «ЭСТА» хамаанда. Бастакы үрдэл — Тойбохойтон «Уу-чукуруктар».
Кылаан Кыайыылаах — Күндэйэ «Кун Дьоно» хамаандата. Кытааччылар бары кыайыы көтөллөнөн үөрэн-көтөн тарҕастылар. Улуустааҕы күрэс тэрээһинигэр уонна ыытыытыгар күүс-көмө буолбут «СунАМП» эдэр педагогтарыгар — С.С.Васильев , П.А.Попов , Т.В.Тихонов , Нь.Я.Назарова , Л.Ю.Семенова , дьүүллүүр сүбэҕэ, спонсордарбытыгар А.А.Константиноваҕа, Е.П.Иванова-Дойдуунаҕа, 1-кы №дээх оскуола кыргыттарыгар уонна бэйэбит выпускниктарбыт — 3-с №дээх оскуола үөрэнээччилэригэр улахан махталбытын тириэрдэбит.
Сунтаар улууһун үөрэҕириитин пресс-сулууспата