Бүгүн алтынньы 8 күнэ – эбии үөрэхтээһин үлэһиттэрин күнэ. Бу үөрүүлээх күнү көрсө Н.М.Родионова аатынан Сунтаардааҕы оҕо дьоҕурун сайыннарар киин төрөппүттэргэ, үөрэнээччилэргэ, бииргэ үлэлэһэр тэрилтэлэрбитигэр, оскуолаларга анаан “Айар үлэ долгунунан айан” диэн ааспыт нэдиэлэҕэ аһаҕас аан күнүн үрдүк таһымҥа тэрийэн ыыттыбыт.
Аһаҕас аан күнүгэр күндү ыалдьыттарынан буоллулар — улуус баһылыгын экономикаҕа солбуйааччыта, дуобат федерациятын бэрэссэдээтэлэ Борис Васильев, улуустааҕы үөрэҕирии салалтатын начальнигын солбуйааччыта Владимир Уаров, улуустааҕы үөрэҕирии салалтатын иитии уонна эбии үөрэхтээһин салаатын сэбиэдиссэйэ Саргылана Горбунова, Сунтаар нэһилиэгин баһылыгын солбуйааччыта Семен Николаев, С.А.Зверев түмэлиттэн Василий Слепцов, улуустааҕы кииннэммит библиотечнай ситимтэн Саргылана Спиридонова, Ньургуяна Данилова, улуустааҕы култуура уонна айылгы салалтатыттан Талбан Хотун-Урсууна, оскуола дириэктэри иитэр үлэҕэ солбуйааччылара — Лилиана Васильева, Розалия Еремеева, Венера Васильева, кылаас салайааччылара, учууталлар – Сардана Кривошапкина, Наталья Андросова, Анна Иванова, Августина Попова, Саргылана Лидочен, төрөппүттэр Степан Егоров, Анна Попова уо.д.а.
Тэрээһин киириитигэр ыалдьыттары киэҥ муора устун борохуот аалга олордон айар үлэ долгунунан айаҥҥа арыаллаатылар тэрийээччи-педагогтар Надежда Потапова, Айна Яковлева уонна дириэктэрбит Ангелина Антонова. Педагогтар үөрэнээччилэрин кытта бэйэлэрин куруһуоктарын, устуудьуйаларын, кулууптарын ситиһиилэрин, үөрэтэр бырагыраамаларын, бырайыактарын кэпсээтилэр. Түмүккэ хараабыл рестораныгар минньигэс фуршет, аһаҕас микрофон тэрилиннэ.
Бу күн бастыҥ эбии үөрэхтээһин педагогтарын үлэлиир, үөрэтэр эйгэлэрин тэрийэр, кинилэр айар дьоҕурдарын арыйар сыаллаах ыытыллыбыт кабинеттары көрүү күрэҕэр кыайыылаахтар ааттара билиннэ. Ол курдук, Вера Зоммер (Art.time.club, Vera Zommer модельнай студия), Варвара Иванова (GraphicART), Галина Лидочен («Глобус” туристско-краеведческай куруһуок ) уонна Елена Томская (“Палитра” ойуулуур-дьүһүннүүр устуудьуйа) үөрэтэр кабинеттара бастыҥнарынан буоллулар.
Ытыктабыллаах улууспут эбии үөрэхтээһинин бэтэрээннэрин, педагогтарын идэлээх бырааһынньыкпытынан итиитик-истиҥник эҕэрдэлиибит. Оҕо дьоҕурун сайыннарар, инники идэтигэр суолу ыйар махталлаах үлэбитигэр ситиһиилэр сиэттиһэн кэлэ турдуннар. Айар үлэнэн – кэлэр кэми түстүүбүт, кэнчээри ыччаты кэрэҕэ сирдиибит!
Айна ЯКОВЛЕВА