6 саастаах Ай-Куо быйыл Тэҥкэ оскуола-саадын бастакы кылааһыгар үөрэнэ киирдэ. «Оскуолаҕа үчүгэйдик үөрэниэм, элбэҕи билиэм, дьоммор туһалаах киһи буола улаатыам. Учууталым үөрэтэрин болҕойон истиэм» диэн кырачаан кыысчаан бэйэтигэр сорук туруорунна. Маладьыас!
Ай-Куо Федор, Клавдия Поповтар улахан кыыстара. Онон ыал улахана буолан дьиэҕэ туһа киһитэ. 3 саастаах балтын көрөр, оонньотор. Арылдьытан күннээҕи сонунун кэпсиир, остуоруйалыыр, ыллаан да ылар.
Ийэлээх аҕата култуура үлэһиттэрэ буолан, борбуйун көтөҕөөт, кыысчаан үлэтин курдук кулууп дьиэҕэ барсан ыллыыры кытары ыллаһан, үҥкүүлүүрү кытары үҥкүүлэһэн улаатта.
Оҕо саадыгар сылдьан араас таһымнаах күрэхтэһиилэргэ көхтөөхтүк кыттара. Дакылаатчыт бэрдэ, онтугар ботуччу ситиһиилэрдээх. Уруһуйдуурун олус сөбүлүүр. Ордук дэгэрэҥ ырыаны табыллан толорор.
Ай-Куо олус үөрүнньэҥ, көрдөөх кыыс.
Яина ВЛАСЬЕВА