Кулун тутар 13 күнүгэр, «Аар Кудай» кэрэ көстүү уонна духуобунас куонкуруһугар бэйэни билиһиннэрии уонна талба талааны көрдөрүү түһүмэҕэ түмүктэннэ. Күн бастакы аҥарыгар кыттааччылар хантан хааннаахтарын, тугунан дьарыктаналларын ирэ-хоро кэпсээтилэр. Бу кылгас, ол эрээри чаҕылхай бэйэлэрин билиһиннэриилэригэр «Аар Кудай» чэрчитинэн ыытыллыбыт маастар кылаастар көмө буолбуттара саарбаҕа суох. Дьүүллүүр сүбэҕэ бааллара: Зарьяна Юмшанова, «Аар Кудай» бырайыак салайааччыта, инбиэстэрэ, Индияҕа ыытыллыбыт «MRS UNITY WORLD » Аан Дойдутааҕы кэрэ көстүү куонкуруһун муҥутуур кыайыылааҕа; Сардаана Брызгалова-Дьокуускай куорат култуураҕа уонна духуобунай сайдыыга уокуруктааҕы бэйэни салайыныытын начаалынньыга; Айталина Адамова- Россия уонна Саха Сирин үтүөлээх норуодунай артыыһа, опернай дива; Петр Макаров-П.А.Ойуунускай аатынан Саха Государственнай.драматическай тыйаатырын дириэктэрэ; Николай Бугаев- Ем.Ярославскай аатынан история уонна култуура музейын дириэктэрэ;Наталья Наумова- ИП Лукиннар Холдиннарын маркетиҥҥа дириэктэрэ, Лилия Дмитриева- Саха Сирин фитнес-аэробика федерациятын исполнительнай дириэктэрэ, Аркадий Уваровскай ХИФУ студенческэй инициативаларын исписэлииһэ, кэнсэр тэрийээччи уонна Виктория Олёнова- «Аар Кудай» Гранд-финалын туруорааччы режиссёра.
Салгыы талаан түһүмэҕэ буолла. Кыргыттар ис дууһалара тугу этэринэн,талба талааннарын дьүүллүүр сүбэ иннигэр долгуйа көрдөрдүлэр. Кыттааччылары өйүү чугас дьоно, оҕолоро,эдьиийдэрэ-балыстара,истиҥ доҕотторо, биир дойдулаахтара кэлбиттэр. Кыргыттар ким хоһоон ааҕан, олоҕун остуоруйатыттан кэпсээн, үгүс кыыс ыллаан-туойан, үҥкүүлээн, хомуска сахалыы матыыптары тыаһатан, дьүүллүүр сүбэни минньигэс астаабыт астарынан күндүлээтилэр, сэмэй бэлэхтэрин ууннулар, уран тарбахтаахтар оҥоһуктарын көрдөрдүлэр.
Бу күн чаҕылхай түгэнинэн «Аар Кудай» туһунан сыалай 3 анабыл ырыа ылланыыта буолла. Ол курдук саҥа буруолуу сылдьар, араадьыйаҕа сүрэхтэнэ илик Катя Черкашина-ЧКРШ толоруутугар «Аар Кудай» тэрээһин гимнэ уонна «Аар Далбар» номинацияҕа кытта сылдьар Амма улууһуттан Вера Софронеева уонна Сунтаартан Тускулаана Горохова-Кобельянова талааннарыгар ыллаан иһитиннэрбит ырыалара.
Вера Софронеева (Амма)
Илиҥҥи базсцы астролога,алгысчыт, куолаһынан уонна музыкальнай инструмент нөҥүө медитациялыыр.
-Талааммар тугу көрдөрөбүн?- диэн олус өр толкуйдаан, кыргыттарбын кытта сүбэлэһэн баран саха дьахтарыгар анаан, өйүүр күүстээх, сахалыы куттаах ырыаны суруйуохха наада диэн буолбута. Бу дьыалаҕа талааннаах , куруук алтыһар доҕотторбор хоһоонун Абдумалики Холикка, муусукатын, аранжировкатын Моисей Кобяковка суруттаран «Аар Кудай» ырыа күн сирин көрдө. Түгэнинэн туһанан үлэлэрин барытын хаалларан туран көмөлөспүт, өйөөбүт атастарбар махтанабын. Бу ырыам куйаартан этиллэн, ситимнэнэн дьон нөҥүө кэлэн наһаа үчүгэйдик айылынна.
Тускулаана Горохова-Кобельянова
Суруналыыс,блогер, «Саха» НКиХ Сунтаардааҕы филиалыгар кэрэспэндьиэн.
-Арай «Аар Кудай» тэрийээһинин туһунан тугу эмэ айан-тутан таһаардахха?-диэн санаа кэлбитэ. Олороот да «Аар Кудай» ааттыын да Ааргын эн» диэн тыллартан саҕыллан хоһоонум суруллан киирэн барбыта.Кыыс куо, далбар уонна хотун туһунан. Маҥнай, кыыс куо күн сиригэр сибэкки курдук киэргэнэн үөрэ-көтө сылдьара, онтон хотун ыал буолар, ситэн-хотон дьиэ кэргэн тэринэр кэмэ онтон далбар хайыы үйэ муударай, олоҕу көрбүт-истибит, билбит, дьон, дойду тапталын ылбыт,кэрэтин билиммит, бигэргэппит киһи буоларын бэлиэтээтим. Түүн үөһэ Анна Тотоноваҕа-Күн Күөрэгэйигэр айбыт хоһооммүн ыытааппын кытта тута матыыбын ыллаан ыыппыта. Мин харахпар ити дьүһүйүүнү хомуһунан, чуһуурбанан, кырыымпанан, сахалыы инструменнарынан арыалланыахтаах диэн санааттан биһиэхэ Сунтаар, Туойдааҕар талаанаах музыкант Дмитрий Попов үөрүүнү кытта сөбүлэһэн чочуйан-оҥорон,ситэрэн-хоторон биэрбитэ.
Дьон олус үчүгэйдик ылынна, истибит дьон сиһим тоноҕоһунан олох уратытык киирдэ да дииллэр, кыттааччылар да атыннык, уратытык ылынныбыт диэн этэллэр. Ону тэҥэ «Аар Кудай» тэрээһиммит фоновай ырыата буолла уонна «Тэтим» араадьыйаҕа сүрэхтэннэ! Бу ырыа айыллыытыгар күүс-көмө буолбут дьүрүлү оҥорбут Анна Тотоноваҕа-Күн Күөрэгэйигэр,муусукаҕа дьүһүйүүтүгэр Дмитрий Поповка уонна куоласпын устааһыҥҥа көмөлөспүт Радомир Сергеевка истиҥ махталбын биллэрэбин. Бу тэрээһинтэн саҕыллан ырыа айыллан кэллэҕэ дии!
Ити курдук кэрэ куолар, далбар хотуннар талааннарын көрөн баран дьүүллүүр сүбэ 10 бастыҥ нүөмэргэ гранд-финалга кэнсиэргэ кытталларыгар сөбүлэҥ биэрдилэр. Бэлиэтээн эттэххэ, бу түмүк буолбатах, сүрүн күрэххэ, ол эбэтэр Гранд-финалга 45 кыттааччы бары кулун тутар 16 күнүгэр Опера уонна балет театрыгар кыттыахтара.
Уйгулаана ПОРТНЯГИНА,
«Аар Кудай» пресс-сулууспата
