Дьокуускай куоракка кулун тутар 8 күнүттэн аан маҥнайгытын ыытыллар «Аар Кудай» норуоттар икки ардыларынааҕы кэрэ көстүү уонна духуобунас күрэһэ саҕаланна. Бу күрэскэ 45 араас саастаах кэрэ куо кытта сылдьар. Ол курдук, Уус Алдан, Мэҥэ Хаҥалас, Чурапчы, Амма, Томпо, Ньурба, Бүлүү, Ленскэй, Эбээн Бытантай, Верхоянскай , Алдан, Уус Майа, Сунтаар улуустарыттан, ону сэргэ Кыргызстан, Бурятия өрөспүүбүлүкэлэриттэн, Соҕуруу Африка Намибия, Ботсвана дойдуларын бэрэстэбиитэллэрэ бааллар. Биһиги Сунтаарбытыттан урбаанньыт Надежда Львова, блогер, суруналыыс Тускулаана Кобельянова-Горохова, Сунтаартан төрүттээх Зульфия Слепцова уонна Элгээйиттэн төрүттээх Матрена Михайлова кытта сылдьаллар. Төрдүөн «Аар Далбар» диэн анал аат түһүмэҕэр киирсэллэр. Тускулаана бу күрэс олус сэргэхтик, уратытык ыытылларын бэлиэтиир. Манна үгүһү биллибит, олус да талааннаах далбардары кытары бииргэ сылдьан, элбэххэ үөрэннибит, бэйэбит сатабылбытын хардарыта үллэстэбит. Бу бырайыак ааптара, «Аар Кудай» духуобунай пуонда төрүттээччитэ, Индияҕа ыытыллыбыт «MRS.UNITY WORLD», Россияҕа «MRS RUSSIAN WORLD» Кэрэ куолар күрэстэрин муҥутуур кыайыылааҕа Зарьяна Юмшанова олус да креативнай киһи, олох араас идеяларынан «умайа» сылдьар диэн санаатын үллэстэр.
Ол курдук, күрэс түмүгүнэн саастарынан арахсан «Аар Куо» (17-30 саастарыгар диэри), «Аар Хотун» (31-41 саастаахтар) уонна «Аар Далбар» (42 саастан үөһэ) диэн анал ааттары ылыахтара. Муҥутуур кыайыылаах «Аар Кудай» үрдүк аатын сүгүөҕэ.
Күрэстэһээччилэри 8 күн устата реалити-шоу ньыматынан араас көрсүһүүлэр, маастар-кылаастар, духуобунас практикалара, cайдыы, бэйэ-бэйэни кытта билсии, кэрэ эйгэлиин алтыһыы, үөрэх кэтэһэр.
Түмүктүүр тэрээһин кулун тутар 16 күнүгэр Суорун Омоллоон аатынан Опера уонна Балет судаарыстыбаннай тыйаатырыгар буолуоҕа Муҥутуур кыайыылаах Индияҕа ыытыллар Норуоттар икки ардыларынааҕы «MRS.UNITY 2025» кэрэ куолар күрэстэригэр путёвканы уонна 1 мөлүйүөн солкуобайдаах бириис тутуоҕа.
Улууспутуттан кытта сылдьар Далбардарбытыгар ситиһиилэри баҕарабыт.
«Сунтаар сонуннара» хаһыат