Үүнэн эрэр 2024 сылы дойдубут бэрэсидьиэнэ Владимир Путин Арассыыйаҕа Дьиэ кэргэн, Саха сирин Ил Дархана Айсен Николаев өрөспүүбүлүкэҕэ Оҕо саас, Сунтаар улууһун Аҕа баһылыга Анатолий Григорьев улууска Аҕам саастаах дьоҥҥо ытыктабыл сылларынан биллэрбиттэрэ.
Хаһан баҕарар, ханна да буоллун, инникини өтө көрөн сөптөөхтүк дьаһанар салайааччылаах, дьонноох дойду аҕам саастаах көлүөнэҕэ ытыктабыллаах, махталлаах сыһыаннаах буолар.
Биһиги улууспутугар биллэриллибит Аҕам саастаахтарга ытыктабыл сылыгар бу дьоһун дьоммут биһиги көлүөнэҕэ тус холобурдарынан элбэххэ үөрэтэн, иитэн таһаарбыттарыгар махтанан туран, кинилэр бүгүҥҥү олохторо чэпчииригэр, уйгулаах буоларыгар үгүс үлэни ыытыахпыт диэн эрэллээхпит.
Итинник санаанан салайтаран, биһиги, улуус уопсастыбаннай сэбиэтин (сал. Львова Н.Г.) чилиэннэрэ, кыттыылаахтара кыттыһан, урукку кэмҥэ көхтөөх үлэлээх уопсастыбанньыктарга ис сүрэхпититтэн Саҥа дьыллааҕы бэлэхтэри оҥорон тиксэрдибит. Бэлэхтэрбитигэр уопсастыбаннай сэбиэт салайааччытын солбуйааччы Семенов Станислав Иванович бэйэтэ үүннэрбит оҕуруот аһылыгыттан набор оҥорон бэлэх ууннубут.
Улуус уопсастыбаннай Сэбиэтин алгыстаах Саҥа дьыллааҕы подароктарын туттулар:
1. Подрясова Фатима Никифоровна, бэтэрээннэр сэбиэттэрин бэрэссэдээтэлэ, Бүлүүчээн.
2. Захарова Анастасия Петровна — үлэ бэтэрээнэ, Хоро нэһилиэгин бочуоттаах олохтооҕо,
3. Ващенко Анна Петровна, тыыл бэтэрээнэ, Устье нэһилиэгин бочуоттаах олохтооҕо,
4. Семенов Петр Петрович, алгысчыт, үс кинигэ автора, үйэтитиигэ үлэлэээччи, көҕүлээччи
5. Чолбодукова Ксения Игнатьевна, 92 саастаах тыыл бэтэрээнэ, Кэмпэндээйи нэһилиэгин бочуоттаах олохтооҕо, тыыл бэтэрээнэ,
6. Александров Прокопий Филиппович, тыыл уонна педагогическай үлэ бэтэрээнэ, Күүкэй нэһилиэгин Ытык олохтооҕо,
7. Егорова Варшаванка Матвеевна, «Үрүччэ» түмсүү салайааччыта,
8. Мохова Ирина Николаевна, «Алгыс» аҕам саастаах дьон түмсүүлэрин чилиэнэ.
Ытыктыыр дьоммутугар үүнэн эрэр сыл сырдыгы, сылааһы аҕаллын диэн туран, чэгиэн туругу уонна уһун дьоллоох олоҕу баҕарабыт.
Анна ИВАНОВА