Бүгүн муус устар 1-кы күнүттэн 4-гэр диэри Дьокуускайтан кэлбит медико-психологическай многопрофильнай биригээдэ биһиги улууспутугар үлэтин саҕалаата.
Бары билэ-көрө сылдьарбытынан уйулҕа үөрэхтээхтэрэ билигин дойдубутугар буола турар балаһыанньанан сибээстээн, тустаах дьоҥҥо көмөлөрө хаһааҥҥытааҕар даҕаны олус наада. Ол курдук, биригээдээҕэ уопуттаах психиатр-быраас Дмитрий Бугаев, клиническай психологтар Любовь Стрекаловская, Эвелина Иванова бааллар. Кинилэр анал байыаннай дьайыы кыттыылаахтарыгар уонна дьиэ кэргэттэригэр психологическай көмөлөрү биирдиилээн консультациялары, сүбэ-ама уонна трениннары ыытыахтара.
Бүгүн байыаннай дьайыы кыттыылааҕа уонна дьиэ кэргэттэрэ нэһилиэктэртэн киирэн психологтар консультацияларын туһаннылар.
Күн иккис аҥарыгар улуус дьаһалтатын аактабай саалатыгар көрсүһүү уонна ис туругу бөҕөргөтөр сыаллаах тренинг ыытылынна. Ыксаллаах быһыы-майгы, санаа-оноо муунтуйуута, куттал хайаан даҕаны киһи уйулҕатыгар бэйэтин суолун-ииһин хаалларара саарбаҕа суох. Көрсүһүүгэ буойун дойдутугар кэлэн чөлүгэр түһэригэр уопсастыба, дьон-сэргэ көмө, тирэх буоларга бэлэм буолуохтаахпытын. Бары бииргэ уһуйаан, оскуола психологтара, хас биирдии киһи үлэлэһиэхтээҕин. Ону тэҥэ, уопсастыбаннай психологтар түмсүүлэрэ тэриллэрэ буоллар диэн көрсүһүүгэ мустубут дьон баҕа санааларын үллэһиннилэр. Салгыы биригээдэ сарсын Элгээйи нэһилиэгэр үлэлиэҕэ. Оттон өйүүн оскуола психологтарын кытта көрсүһүөхтэрэ.
Санатан эттэххэ, муус устар 3-с күнүгэр сарсыарда 9 ч. поликлиникаҕа кыһалҕалаах дьон психологтартан сүбэ-ама ылыаххытын сөп. Маны сэргэ анонимнай, босхо суһал психологическай көмөнү бу нүөмэргэ 84112507967, 88002221407 эрийэн билсиҥ.
Алена ИВАНОВА