Дьокуускай куоракка П.А. Ойуунускай аатынан литературнай түмэлгэ биир дойдулаахпыт, медицинскэй билим дуоктара, СӨ суруйааччыларын сойууһун чилиэнэ Валериан Николаев «НАРКОМ ПЛАТОН ОЙУУНУСКАЙ. Олоҕун биллибэт страницаларыттан» кинигэтин сүрэхтэниитэ бэрт сэргэхтик барда. «С.А. Новгородов аатынан «Айар» национальнай кинигэ кыһата» АО-ҕа бэчээттэнэн тахсыбыт кинигэҕэ ааптар биллиилээх судаарыстыбаннай, уопсастыбаннай диэйэтэл, Саха автономиятын тэрийээччилэриттэн биирдэстэрэ П.А. Ойуунускай үгүс өрүттээх үтүмэн үлэтиттэн Үөрэх, доруобуйа харыстабылын уонна социальнай харалта холбоһуктаах бөдөҥ наркоматтарын салайбыт кэмэ (06.01.1928-04.03.1929) кэпсэнэр.
Тэрээһини «С.А. Новгородов аатынан «Айар» национальнай кинигэ кыһата» АО сүрүн эрэдээктэрэ, СӨ культуратын үтүөлээх үлэһитэ, суруйааччы, тылбаасчыт, публицист В.Н. Луковцев-Дьурустаан архыып докумуоннарыгар олоҕурбут П.А. Ойуунускай олоҕун, үлэтин сырдатар кинигэ тахсыбытынан астынарын эттэ. Салгыы кинигэ сүрэхтэниитигэр СӨ норуодунай суруйааччыта Е.В. Слепцова-Куорсуннаах, филологическай билим дуоктара, М.К. Аммосов аатынан ХИФУ профессора, литератураны ырытааччы В.Б. Окорокова, «Полярная звезда» литературнай-уус-уран уонна уопсастыбаннай-политическай сурунаал сүрүн эрэдээктэрэ, СӨ Духуобунаска академиятын академига В.С. Доллонов, СӨ судаарыстыбаннай архыыбын сүрүн исписэлииһэ Н.С. Степанова, Гуманитарнай чинчийии институтун үлэһитэ, историческай билим кандидата П.П. Петров-Хардыы, суруйааччы Н.Н. Аржаков-Боло Уус, суруйааччы В.Ф. Чернявскай, СӨ социальнай харалтатын эйгэтин бэтэрээн үлэһитэ А.В. Степанова о.д.а. тыл эттилэр, санааларын атастастылар.
Тыл этээччилэр «НАРКОМ ПЛАТОН ОЙУУНУСКАЙ. Олоҕун биллибэт страницаларыттан» кинигэ архыып докумуоннарыгар олоҕуран суруллубут буолан, тустаах исписэлиистэргэ, ааҕааччыларга туһалаах элбэх информациялааҕын бэлиэтээтилэр. Истиҥ, киэҥ кэпсэтиигэ П. Ойуунускай оччотооҕу кэм уопсастыбаннай-политическай олоҕун өрүттэрин сырдатар «Мөккүөр» уонна «Ойуунускай көмүллүбүт ырыата» хоһоонноро кинигэҕэ ааптар нууччалыы тылбааһынан киирбиттэрэ ааҕааччы болҕомтотун тардыаҕа бэлиэтэннэ.
Кинигэ түмүгэр ааптар 1928-1929 сс. П.А. Ойуунускай олоҕор, үлэтигэр тосту уларыйыы сылларынан буолбуттара, мантан ыла биһиги атын Ойуунускайы, үлэтин, олоҕун бүтүннүү литератураҕа, билимҥэ анаабыт Ойуунускайы көрөбүт диэн суруйбута сонуннук иһилиннэ.
«НАРКОМ ПЛАТОН ОЙУУНУСКАЙ. Олоҕун биллибэт страницаларыттан» кинигэ 500 экз. өрөспүүбүлүкэ бары бибилэтиэкэлэригэр тарҕанан, оскуола үөрэнээччилэригэр, ааҕааччыларга быһаччы тиийиэҕэ.
Борис НИКОЛАЕВ